ارب پتی سرمایہ کار کا انوکھا شوق: پانی چھوڑ کر روزانہ کولڈ ڈرنک پیتے ہیں

دنیا کے معروف ارب پتی سرمایہ کار وارن بفٹ اپنی غیر معمولی کاروباری کامیابیوں اور سرمایہ کاری کی حکمت عملی کے باعث دنیا بھر میں شہرت رکھتے ہیں، تاہم ان کی ذاتی زندگی کی ایک دلچسپ عادت نے بھی لوگوں کی توجہ حاصل کرلی ہے۔

میڈیا رپورٹس میں اس حوالے سے دعویٰ کیا گیا ہے کہ وہ گزشتہ 48 برس سے سادہ پانی پینے کے بجائے کوکا کولا کو ترجیح دے رہے ہیں، جبکہ ان کا پسندیدہ مشروب چیری کوک ہے۔

اس دلچسپ عادت کا انکشاف ارب پتی سرمایہ کار بل ایک مین نے ایک پوڈکاسٹ میں گفتگو کرتے ہوئے کیا۔

انہوں نے وارن بفٹ کے ساتھ اپنی ایک پرانی ملاقات کا واقعہ سناتے ہوئے بتایا کہ ایک مرتبہ کھانے کے دوران انہوں نے بفٹ کو پینے کے لیے پانی پیش کیا، لیکن انہوں نے اسے لینے سے انکار کردیا اور اس کے بجائے سافٹ ڈرنک طلب کرلی۔

جب بل ایک مین نے حیرت کا اظہار کرتے ہوئے پوچھا کہ کیا وہ پانی نہیں پیتے تو بفٹ نے مبینہ طور پر بتایا کہ انہیں 48 برس سے پانی پینے کی عادت نہیں رہی۔

وارن بفٹ کی مشروبات سے متعلق پسند کا اندازہ اس بات سے بھی لگایا جاسکتا ہے کہ انہوں نے 2015 میں امریکی جریدے فارچیون کو انٹرویو دیتے ہوئے بتایا تھا کہ وہ روزانہ تقریباً 5 کین کوکا کولا استعمال کرتے ہیں۔ اگر ان کی روزانہ خوراک 2700 کیلوریز پر مشتمل ہو تو اس کا تقریباً ایک چوتھائی حصہ اسی مشروب سے حاصل ہوتا ہے۔

دلچسپ پہلو یہ ہے کہ بفٹ ابتدا ہی سے کوکا کولا کے شوقین نہیں تھے بلکہ کئی دہائیوں تک پیپسی ان کا پسندیدہ مشروب رہی۔ ان کے بیٹے ہاورڈ بھی والد کی اس پسند کے باعث انہیں مذاق میں ’پیپسی وارن‘ کہا کرتے تھے، تاہم 1986 میں انہوں نے پیپسی چھوڑ کر چیری کوک کو اپنا پسندیدہ مشروب بنا لیا، جو بعد میں ان کی شخصیت کی پہچان بن گیا۔

دوسری جانب ماہرین صحت کا کہنا ہے کہ پیاس بجھانے کے لیے سادہ پانی بہترین انتخاب ہے، جبکہ میٹھے مشروبات کا مسلسل اور زیادہ استعمال مٹاپے، دانتوں کی خرابی اور ٹائپ ٹو ذیابیطس کے خطرات بڑھا سکتا ہے۔

واضح رہے کہ 48 سال تک پانی نہ پینے کا دعویٰ بل ایک مین کے بیان پر مبنی ہے اور وارن بفٹ کی جانب سے اس کی آزادانہ تصدیق سامنے نہیں آئی۔