حکومتی نااہلی کے باعث ملک میں گندم کا بڑا بحران جنم لے رہا ہے: مفتاح اسماعیل

کراچی: سابق وفاقی وزیر خزانہ مفتاح اسماعیل نے خبردار کیا ہے کہ وفاقی حکومت کی ناقص پالیسیوں اور بروقت فیصلے نہ کرنے کے باعث ملک کو گندم کے بڑے بحران کا سامنا کرنا پڑ سکتا ہے۔
اپنے بیان میں مفتاح اسماعیل نے کہا کہ کراچی میں گندم کی قیمت 157 روپے فی کلو تک پہنچ گئی ہے اور آنے والے دنوں میں آٹے کی قیمت 200 روپے فی کلو یا اس سے بھی زیادہ ہوسکتی ہے۔ ان کے مطابق یہی گندم کسانوں نے رواں سال اپریل اور مئی میں 65 روپے فی کلو سے بھی کم قیمت پر فروخت کی تھی، جبکہ بیرون ملک سے درآمد کی جانے والی گندم کی کراچی پہنچنے تک لاگت تقریباً 95 روپے فی کلو پڑتی ہے۔
انہوں نے کہا کہ حکومت نے نہ تو بروقت گندم درآمد کی اور نہ ہی نجی شعبے کو اس کی درآمد کی اجازت دی۔ حکومت نجانے کن وجوہات کی بنا پر گندم کی درآمد اور برآمد کا عمل تجارتی کارپوریشن پاکستان (ٹی سی پی) کے ذریعے کرنا پسند کرتی ہے۔
مفتاح اسماعیل کا کہنا تھا کہ 10 لاکھ ٹن گندم درآمد کیے جانے کے باوجود ملک میں قلت برقرار ہے اور قیمتیں مسلسل بڑھ رہی ہیں۔ خدشہ ہے کہ عوامی احتجاج کے بعد حکومت مزید گندم درآمد کرنے کا فیصلہ کرے گی تو اس کی ترسیل فروری یا مارچ میں ممکن ہوسکے گی۔
سابق وزیر خزانہ نے خبردار کیا کہ اگر درآمدی گندم مارچ یا اپریل میں سندھ اور پنجاب پہنچتی ہے تو مقامی منڈیوں میں قیمتیں گرنے کا امکان ہے، جس سے کسانوں کو نقصان اٹھانا پڑ سکتا ہے۔ ان کا کہنا تھا کہ حکومت کو گندم درآمد کرنی ہے تو فوری اقدامات کرنا ہوں گے۔
انہوں نے مزید کہا کہ حکومت نے چینی کے کارخانوں کے مالکان کے مفادات کو ترجیح دیتے ہوئے انہیں چینی برآمد کرنے کی اجازت دی، جبکہ حکومتی نااہلی اور ذاتی مفادات پر مبنی فیصلوں کا خمیازہ عام صارفین بھگت رہے ہیں۔
مفتاح اسماعیل کے مطابق موجودہ صورتحال میں تیل صاف کرنے والی کمپنیوں، تیل کی فروخت سے وابستہ اداروں اور چینی کے کارخانوں کو بھاری منافع حاصل ہو رہا ہے، جبکہ عوام مہنگائی اور اشیائے ضروریہ کی بڑھتی ہوئی قیمتوں کا بوجھ برداشت کرنے پر مجبور ہیں۔
بشکریہ روزنامہ جسارت