بھارتی فاسٹ بولر محمد شامی کا ٹیسٹ کرکٹ کو خیرباد کہنے کا اعلان

بھارت کے معروف فاسٹ بولر محمد شامی نے ٹیسٹ کرکٹ کو خیرباد کہنے کا فیصلہ کرلیا۔

36 سالہ فاسٹ بولر نے جمعے کی شب فوٹو اور ویڈیو شیئرنگ کی ایپلیکیشن انسٹاگرام پر ویڈیو پیغام جاری کرتے ہوئے اپنے 13 سالہ طویل ٹیسٹ کیریئر کے خاتمے کا اعلان کیا، تاہم وہ محدود اوورز کی کرکٹ میں بدستور بھارت کی نمائندگی کے لیے دستیاب رہیں گے۔

محمد شامی نے نومبر 2013 میں ویسٹ انڈیز کے خلاف ٹیسٹ کرکٹ میں قدم رکھا تھا۔ اپنے پہلے ہی مقابلے میں انہوں نے شاندار بولنگ کا مظاہرہ کرتے ہوئے 118 رنز دے کر 9 کھلاڑیوں کو پویلین کی راہ دکھائی اور ابتدائی مرحلے ہی میں اپنی صلاحیتوں کا بھرپور اظہار کیا۔

بھارتی فاسٹ بولر نے اپنے کیریئر کے دوران مجموعی طور پر 64 ٹیسٹ میچز کھیلے اور 27.71 کی اوسط سے 229 وکٹیں حاصل کیں۔ ان کی مسلسل عمدہ کارکردگی نے انہیں بھارت کے نمایاں اور کامیاب ترین فاسٹ بولرز کی صف میں شامل کیا۔

اپنے الوداعی پیغام میں محمد شامی نے کہا کہ ٹیسٹ کرکٹ میں گزرا 13 سالہ سفر مختلف تجربات اور مشکلات سے بھرپور رہا۔ اس دوران انہیں متعدد بار انجریز اور مشکل حالات کا سامنا کرنا پڑا، تاہم انہوں نے ہمت نہیں ہاری اور ہر مرتبہ محنت کے ذریعے میدان میں واپسی کی کوشش کی۔

انہوں نے اپنے طویل کرکٹ سفر میں رہنمائی اور معاونت فراہم کرنے پر کوچز، ٹرینرز، فزیوتھراپسٹس اور مداحوں کا شکریہ ادا کرتے ہوئے کہا کہ ان تمام افراد کی حمایت نے ان کے کیریئر میں اہم کردار ادا کیا۔

محمد شامی نے واضح کیا کہ ٹیسٹ کرکٹ سے علیحدگی کا فیصلہ کھیل سے مکمل کنارہ کشی نہیں ہے، وہ ایک روزہ اور ٹی 20 کرکٹ کے علاوہ انڈین پریمیئر لیگ اور مقامی سطح کے مقابلوں میں بھی حصہ لیتے رہیں گے۔

واضح رہے کہ شامی نے آخری مرتبہ 2023 میں ورلڈ ٹیسٹ چیمپئن شپ کے فائنل میں بھارت کی جانب سے ٹیسٹ میچ کھیلا تھا، جبکہ مارچ 2025 میں چیمپئنز ٹرافی کے فائنل میں آخری بار بھارتی ٹیم کی نمائندگی کی تھی۔