فواد چوہدری جیسے لوگوں کی جگہ جیل ہو گی، عابد شیر علی

مسلم لیگ ن کے رہنما عابد شیر علی کا کہنا ہے کہ فواد چوہدری کی گرفتاری قانونی طریقے سے عمل میں آئی، ان جیسے لوگوں کی جگہ جیل ہو گی۔

اسلام آباد میں عابد شیر علی نے عطا تارڑ کے ہمراہ پریس کانفرنس کرتے ہوئے کہا کہ فواد چوہدری کو کس نے اختیار دیا کہ الیکشن کمیشن کو دھمکی دے، الیکشن کمشنر کا تعین عمران خان حکومت نے کیا، ن لیگ نے نہیں کیا۔

انہوں نے کہا کہ کیا پاکستان بنانا ری پبلک ہے، آپ نے پاکستان کو کیا اپنے باپ دادا کی جاگیر سمجھا ہوا ہے، آپ نے پاکستان کے سیکیورٹی اداروں پر الزام تراشی کی۔

پاکستان تحریک انصاف کے رہنما فواد چوہدری کی بازیابی کے لیے لاہور ہائی کورٹ میں درخواست دائرکردی گئی۔

عابد شیر علی کا کہنا ہے کہ نواز شریف کے ساتھ ظلم و زیادتی کی گئی، ان کو ملک بدر کیا گیا، ہمارے لوگوں پر تو منشیات کے پرچے ہوئے، اسمبلیوں سے نکال دیا گیا، نہال ہاشمی، طلال چوہدری کو کوئی بات نہ کرنے پر ثاقب نثار نے ڈس کوالیفائی کیا۔

ان کا یہ بھی کہنا ہے کہ جاوید لطیف سے رانا ثناء اللّٰہ تک پر جھوٹی ایف آئی آرز کاٹی گئیں، آپ کی مرضی کا چیف منسٹر تھا جس کو آپ سب سے بڑا چور کہتے تھے، جسے آپ سب سے بڑا چور کہتے تھے وہ آپ کا وزیرِ اعلیٰ تھا۔

بشکریہ جنگ