بابر اعظم کو 23 مارچ کو کیا ملنے والا ہے؟

قومی کرکٹ ٹیم کے کپتان بابر اعظم کو پاکستان کے لیے نمایاں کارکردگی دکھانے پر اعلیٰ سول اعزاز سے نوازا جائے گا۔

بابر اعظم کو 23 مارچ کو یوم پاکستان کی تقریب کے موقع پر ستارہ امتیاز دیا جائے گا، جس کے بعد وہ یہ اعزاز حاصل کرنے والے پاکستان کے سب سے کم عمر ترین کرکٹر بن جائیں گے۔

اس سے قبل سابق کپتان سرفراز احمد ستارہ امتیاز حاصل کرنے والے سب سے کم عمر پاکستانی کرکٹر تھے۔

حکومت پاکستان نے گزشتہ سال 14 اگست کو اعلان کیا تھا کہ بابر اعظم کو ستارہ امتیاز دیا جائے گا اور اب تقریب کی تاریخ کی تصدیق کر دی گئی ہے۔

اس سے قبل شاہد آفریدی، سرفراز احمد، مصباح الحق اور یونس خان کو ستارہ امتیاز سے نوازا جا چکا ہے۔

اس کے علاوہ کھیلوں میں شاندار کامیابی پر محمد یوسف، سعید اجمل، جاوید میانداد اور انضمام الحق کو بھی ستارہ امتیاز مل چکا ہے۔

بشکریہ جنگ