الیکشن کیلئے سرکاری وسائل استعمال ہو رہے ہیں: مئیر راولپنڈی

راولپنڈی کے میئر سردار نسیم کا کہنا ہے کہ ہم اپنے ووٹرز کی حفاظت کے لیے موجود ہیں، کشمیری ووٹرز گھروں سے نکلیں، الیکشن کے لیے سرکاری وسائل استعمال ہو رہے ہیں۔

آزاد جموں کشمیر کی قانون ساز اسمبلی کے انتخابات کے سلسلے میں ووٹ ڈالنے کا عمل جاری ہے، پولنگ شام 5 بجے تک بغیر کسی وقفے کے جاری رہے گی۔

آزاد کشمیر کے عام انتخابات کے سلسلے میں مئیر راولپنڈی سردار نسیم نے شہر میں مختلف علاقوں میں قائم پولنگ اسٹیشنز کا دورہ کیا۔

اس موقع پر انہوں نے کہا کہ سپریم کورٹ کے حکم کےباوجود حکومت ہمیں راول پنڈی کا مئیر ماننے کو تیار نہیں ہے۔

آزاد کشمیر کے حلقہ ایل اے 39 جموں 6 سے مسلم لیگ نون کے امیدوار راجہ صدیق کا کہنا ہے کہ ہم پولنگ کے عمل سے مطمئن نہیں ہیں۔

راولپنڈی کے میئر کا مزید کہنا ہے کہ پولیس سمیت تمام سرکاری وسائل آزاد کشمیر کے الیکشن کے لیے استعمال کیئے جا رہے ہیں۔

سردار نسیم نے یہ الزام بھی عائد کیا ہے کہ الیکشن مہم کے لیے سرکاری گاڑیاں اور وسائل کا استعمال کیا جا رہا ہے۔

بشکریہ جنگ