پی ایس ایل کا ہائی اسکورنگ میچ شاہد آفریدی کو پسند آ گیا

پاکستان سپر لیگ میں گزشتہ روز راولپنڈی میں ہونے والا ہائی اسکورنگ میچ شاہد آفریدی کو بھی پسند آ گیا۔ 

سماجی رابطے کی ویب سائٹ ٹوئٹر پر جاری کیے گئے پیغام میں شاہد آفریدی نے بابر اعظم، جیسن روئے، محمد حفیظ اور صائم ایوب کی بیٹنگ کی تعریف کی۔

شاہد آفریدی نے پشاور زلمی کے کپتان بابر اعظم کی تعریف کرتے ہوئے کہا کہ انہوں نے 60 گیندوں پر سنچری بناکر جارحانہ اننگز کھیلی۔

سابق کپتان کا کہنا ہے کہ صائم ایوب اپنی بیٹنگ سے سب کو متاثر کر رہا ہے۔

انہوں نے کہا کہ کوئٹہ گلیڈی ایٹرز جیسن روئے کی اس طرح کی اننگز کو مس کر رہا تھا۔

شاہد آفریدی نے محمد حفیظ کی بیٹنگ کی تعریف کرتے ہوئے کہا کہ انہوں نے شاندار بیٹنگ کر کے میلہ ہی لوٹ لیا، کیا میچ تھا۔

واضح رہے کہ پاکستان سپر لیگ (پی ایس ایل) 8 کے 25ویں میچ میں کوئٹہ گلیڈی ایٹرز نے تاریخ رقم کی تھی۔

پشاور زلمی کے 241 رنز کے ہدف کو کوئٹہ گلیڈی ایٹرز نے صرف 2 وکٹوں کے نقصان پر 10 گیندیں قبل ہی حاصل کرلیا تھا۔

بشکریہ جنگ