بابر اعظم کی سنچری، پشاور زلمی کا کوئٹہ گلیڈی ایٹرز کو 241 رنز کا ہدف

پاکستان سپر لیگ (پی ایس ایل) 8 کے 25ویں میچ میں پشاور زلمی نے کوئٹہ گلیڈی ایٹرز 241 رنز کا ہدف دے دیا۔

راولپنڈی کرکٹ اسٹیڈیم پر ٹاس جیت کر بیٹنگ کا فیصلہ کرنے والی پشاور زلمی نے مقررہ 20 اوورز میں 2 وکٹ پر 240 رنز بنائے۔

پشاور زلمی کے کپتان بابر اعظم اور اوپننگ بیٹر صائم ایوب نے پاکستان سپر لیگ (پی ایس ایل) کی تاریخ کی دوسری بڑی شراکت قائم کردی۔

پشاور کی طرف سے کپتان بابر اعظم نے 65 گیندوں پر 115 رنز کی اننگز کھیلی جبکہ صائم ایوب نے 34 گیندوں 74 رنز بناکر پویلین لوٹے۔

دونوں کھلاڑیوں نے پہلی وکٹ پر 162 رنز کی شراکت قائم کی، جو پی ایس ایل کی تاریخ کی دوسری بڑی شراکت ہے۔

میچ کے دوران کوئٹہ گلیڈی ایٹرز کے بولرز اور فیلڈرز بے بس دکھائی دیے، بابر اور صائم ایوب کے بعد رومین پاول نے بھی ہٹنگ کی، وہ 18 گیندوں پر 35 رنز کے ساتھ ناقابل شکست رہے۔

پاکستانی بیٹر بابر اعظم نے پاکستان سپر لیگ (پی ایس ایل) 8 میں کوئٹہ گلیڈی ایٹرز کے خلاف میچ میں ایک اور سنگ میل عبور کرلیا۔

کوئٹہ گلیڈی ایٹرز کی طرف سے ڈووین پریٹوریئس نے صائم ایوب کو آؤٹ کیا جبکہ بابر اعظم رن آؤٹ ہوئے۔

بابر اعظم نے میچ کے دوران پی ایس ایل میں 26 نصف سنچریوں کے بعد اپنی پہلی سنچری بنائی، انہوں نے 115 رنز کی اننگز کے دوران 3 چھکے اور 15 چوکے لگائے۔

 اس قبل میچ کی ٹاس کےلیے پشاور زلمی کے کپتان بابر اعظم اور کوئٹہ گلیڈی ایٹرز کی طرف سے محمد نواز میدان میں اترے۔

پاکستان سپر لیگ (پی ایس ایل) 8 میں منگل کو اسلام آباد یونائیٹڈ کی ملتان سلطانز کے خلاف کامیابی نے ٹورنامنٹ کو مزید دلچسپ بنادیا ہے۔

اس موقع پر بابر اعظم نے کہا کہ پچھلے 2، 3 میچز میں پہلے بیٹنگ کی اور کامیاب ہوئے ہیں۔

انہوں نے مزید کہا کہ کوشش کریں گے کہ زیادہ رنز کریں اور اسکور کا دفاع کریں، ہمارا کمبی نیشن اچھا جارہا ہے، گزشتہ میچ کی ٹیم کو برقرار رکھا ہے۔

محمد نواز نے بتایا کہ ہماری ٹیم میں 3 تبدیلیاں کی گئی ہیں، پوری کوشش ہوگی کہ پشاور کو کم اسکور تک محدود رکھیں۔

سرفراز احمد گزشتہ میچ میں انگلی میں انجری کا شکار ہوگئے تھے، آج اُن کی جگہ محمد نواز کو کوئٹہ گلیڈی ایٹرز کی کپتانی کا موقع میسر آیا ہے۔

دنیائے کرکٹ کے مایہ ناز اسپنر راشد خان نے پاکستان سپر لیگ (پی ایس ایل) فرنچائز لاہور قلندرز سے متعلق اپنے جذبات کا اظہار کردیا۔

پی ایس ایل میں ان دونوں ٹیموں کے درمیان ہونے والے گزشتہ 5 مقابلے پشاور زلمی کے نام رہے ہیں، 8ویں سیزن کے پہلے میچ میں زلمی نے کوئٹہ کو 4 وکٹوں سے شکست دی تھی۔

آج کے میچ میں پشاور زلمی کی طرف سے کپتان بابر اعظم، صائم ایوب، محمد حارث، ٹام کوہلر، حسیب اللّٰہ خان، رومین پاول، امیر جمال، وہاب ریاض، عظمت اللّٰہ عمرزئی، ارشاد اقبال اور مجیب الرحمان میدان میں اتر رہے ہیں۔

ادھر کوئٹہ گلیڈی ایٹرز کی فائنل الیون میں مارٹن گپٹل، جیسن روئے، ول سمیڈ، افتخار عالم، محمد حفیظ، محمد نواز (کپتان)، عمر اکمل، ڈووین پریٹوریئس، محمد حسنین، نسیم شاہ اور ایمل خان شامل ہیں۔

بشکریہ جنگ