جنوبی کوریا کا آبنائے ہرمز کے قریب بحری نگرانی کے طیارے اور ماہرین تعینات کرنے کا فیصلہ

جنوبی کوریا نے آبنائے ہرمز کے قریب سمندری راستوں کو محفوظ رکھنے کی کوششوں میں مدد کے لیے بحری نگرانی کے طیارے اور دھماکا خیز مواد ناکارہ بنانے والے ماہرین کی ٹیم تعینات کرنے کا فیصلہ کیا ہے۔

خبر رساں ادارے اے ایف پی کے مطابق جنوبی کوریا کی وزارتِ دفاع نے تصدیق کی ہے کہ حکومت نے اپنے چیونگہے بحری قزاقی مخالف یونٹ کے آپریشنل دائرے کو وسعت دینے کا فیصلہ کیا ہے۔ یہ یونٹ اس وقت آبنائے ہرمز کے قریب عمان کے جنوب میں سمندری حدود میں سرگرم ہے۔

وزارتِ دفاع کے مطابق اس مشن کے تحت بحری نگرانی کے طیارے اور دھماکا خیز مواد ناکارہ بنانے کے ماہرین علاقے میں تعینات کیے جائیں گے، تاکہ اہم سمندری گزرگاہ میں جہازوں کی آمدورفت محفوظ بنانے میں مدد مل سکے۔

آبنائے ہرمز خلیج فارس کو خلیج عمان اور بحیرہ عرب سے ملاتی ہے اور عالمی سطح پر تیل کی ترسیل کے اہم ترین راستوں میں شمار ہوتی ہے۔ اس گزرگاہ پر بحری جہازوں کی حفاظت اور آمدورفت کی بحالی عالمی توانائی کی منڈی اور تجارت کے لیے بھی اہم ہے۔