انڈیا نے کووڈ کی نئی سفری پابندیوں کے تحت برطانوی شہریوں کے لیے دس دن لازمی قرنطینہ کی شرط عائد کر دی ہے۔

انڈین حکام کی جانب سے عائد کی جانے والی کورونا پابندیوں کے تحت انڈیا کا سفر کرنے والے تمام برطانوی شہریوں جن کی کورونا ویکسین بھی مکمل ہو چکی ہے کے لیے دس دن قرنطینہ کرنا لازمی قرار دیا ہے۔

اس پابندی کا اطلاق سوموار چار اکتوبر سے ہو گا۔

انڈین حکومت کا کہنا ہے کہ برطانوی شہریوں کے لیے اس پابندی کا اطلاق برطانیہ کی جانب سےانڈین شہریوں کے لیے شرائط کے ‘جواب’ میں کیا گیا ہے۔

واضح رہے کہ برطانیہ کی جانب سے ایسے تمام انڈین شہری جنھیں انڈیا میں تیار کردہ ایسٹرازنیکا جسے کووی شیلڈ ویکسین کا نام دیا گیا ہے کی مکمل خوراک لگنے کے باوجود برطانیہ پہنچے پر قرنطینہ کرنا پڑتا ہے۔

لیکن اسی طرح ویکسین لگوانے والے بہت سے دیگر ممالک کے شہریوں کو برطانیہ پہنچنے پر ان پابندیوں کا سامنا نہیں کرنا پڑ رہا ہے۔ برطانیہ کو انڈیا میں تیار کردہ کویڈ شیلڈ ویکسین کی افادیت کے متعلق کچھ تحفظات ہیں۔ اور اس کے باعث دونوں ممالک میں ایک تناؤ رہا ہے۔

یہ بھی پڑھیے

کورونا سے بھی مہلک وائرس جو ایشیا کو اپنی لپیٹ میں لے سکتا ہے

انڈیا کورونا کی خطرناک دوسری لہر کو روکنے میں ناکام کیوں رہا؟

انڈیا میں کورونا سے بھی خطرناک نیپا وائرس کی تشخیص، کیرالا میں 12 سالہ لڑکا ہلاک

برطانیہ میں حکام نے گذشتہ ماہ انڈیا کی جانب سے شدید ردعمل ظاہر کرنے کے بعد کویڈ شیلڈ ویکسین کو منظور شدہ ویکسینز کی فہرست میں شامل کر لیا ہے۔ انڈیا نے مقامی طور پر تیار کردہ کویڈ شیلڈ ویکسین کی اب تک 72 کروڑ خوراکیں اب تک اپنے شہریوں کو لگا دی ہیں۔ یہ وہ ہی ایسٹرا زنیکا ویکسین ہے جو برطانیہ میں شہریوں کو لگائی جا رہی ہے۔

برطانیہ کی جانب سے جاری کردہ نئی سفری پابندیوں کے تحت سوموار سے دیگر ممالک سے برطانیہ آنے والے ایسے مسافروں کو جنھیں کورونا کی مکمل ویکسین لگ چکی ہے خودساختہ قرنطینہ کرنا ہوگا۔

لیکن انڈیا کا شمار ایسے ممالک کی فہرست میں نہیں ہے جس کے باعث برطانیہ پر امتیاز برتنے کے مزید الزامات اور اس کے خلاف احتجاج سامنے آئے ہیں۔

گذشہ ماہ انڈیا کے وزیر خارجہ سبرامنیم جے شنکر نے برطانوی ہم منصب لز ٹروس سے نیو یارک میں ہونے والے اقوام متحدہ کے اجلاس کے موقع پر ملاقات کی تھی۔ اس ملاقات میں انھوں نے انڈین شہریوں کے قرنطینہ کر پابندی کو حل کرنے پر زور دیا تھا۔