گورنر پنجاب عمر سرفراز چیمہ کا کہنا ہے کہ بیرونی سازش کے ذریعے جمہوریت، آئین اور قانون کا قتل کیا گیا۔
جاری کیے گئے بیان میں گورنر پنجاب عمر سرفراز چیمہ نے کہا ہے کہ این ایس سی کے 2 اعلامیوں میں بیرونی سازش کی تصدیق کے بعد شک کی گنجائش نہیں رہی۔
ان کا کہنا ہے کہ عدلیہ، پارلیمنٹیرینز اور سیاسی جماعتوں کا کردار اس بحران میں انتہائی اہم ہے اور ان کا عمل قوم کے سامنے ہے۔
عمر سرفراز چیمہ نے کہا کہ بیرونی سازش میں اندرونی سہولت کاروں کے ذریعے مداخلت کر کے جمہوریت کا قتل کیا گیا۔
انہوں نے کہا کہ بیرونی سازش میں اندرونی سہولت کاروں کے ذریعے پارلیمان کی بالا دستی تہس نہس کی گئی، یہی واردات پنجاب میں دہرانے کی کوشش کی گئی۔
گورنر پنجاب عمر سرفراز چیمہ نے کہا کہ آئین، قانون اور سیاسی تاریخ کی روشنی میں اس کا راستہ روکنے کی کوشش کی ہے۔
ان کا مزید کہنا ہے کہ دلیر سپاہیوں نے سرحدوں کی حفاظت اور دہشت گردی کے خاتمے کے لیے ہزاروں جانوں کے نذرانے پیش کیے ہیں۔
گورنر پنجاب عمر سرفراز چیمہ نے یہ بھی کہا ہے کہ کوئی شرم ہوتی ہے، کوئی حیاء ہوتی ہے، افواجِ پاکستان پر سازش میں ملوث ہونے کے الزامات لگانا ملک سے غداری ہے۔
Comments are closed.