بختاور بھٹو کا دوسرا بیٹا 1 سال کا ہو گیا، بلاول کی مبارکباد

پاکستان پیپلز پارٹی کے صدر آصف علی زرداری کی صاحبزادی اور چیئرمین بلاول بھٹو زرداری کی بہن بختاور بھٹو زرداری کا دوسرا بیٹا ایک سال کا ہو گیا۔

محترمہ بینظیر بھٹو شہید کی بڑی بیٹی بختاور بھٹو کے گزشتہ سال 5 اکتوبر کو پیدا ہونے والے دوسرے صاحبزادے میر سجاول محمود چوہدری کی گزشتہ روز پہلی سالگرہ تھی۔

فوٹو اینڈ ویڈیو شیئرنگ پلیٹ فارم انسٹا گرام پر اسٹوری شیئر کرتے ہوئے بختاور نے اپنے چھوٹے بیٹے کو منفرد انداز میں سالگرہ کی مبارک باد دی اور ساتھ ہی اس کے ہمراہ ایک مختصر ویڈیو کلپ بھی شیئر کیا ہے۔

انہوں نے اپنی انسٹا اسٹوری میں اپنے دونوں بیٹوں کی خوبصورت تصویر شیئر کی ہیں اور لکھا ہے کہ اگلے 5 دن کے لیے میں دو ایک سال کے لڑکوں کی ماما ہوں، پہلی سالگرہ مبارک ہو میر سجاول۔

ان کی شیئر کی گئی تصویر میں میر حاکم محمود چوہدری اور میر سجاول محمود چوہدری کی شکلیں نظر نہیں آ رہیں۔

انہوں نے اپنے چھوٹے بیٹے میر سجاول محمود چوہدری کے ہمراہ ایک مختصر ویڈیو کلپ بھی شیئر کیا جس کے کیپشن میں انہوں نے لکھا کہ ’پہلی سالگرہ مبارک ہو میرے میر سجاول ، اللّہ آپ کی رہنمائی اور حفاظت کرئے‘۔

دوسری جانب ننھے میر سجاول محمود چوہدری کے ماموں بلاول بھٹو زرداری اور خالہ آصفہ بھٹو زرداری نے بھی اس خاص دن کی مناسبت سے اپنے ننھے بھانجے کو مبارک باد دیتے ہوئے انسٹا اسٹوری شیئر کی ہے۔

بشکریہ جنگ