این سی او سی نے اسٹیڈیم میں 50 فیصد شائقین کو آنے کی اجازت دیدی
وفاقی وزیر منصوبہ بندی اسد عمر کی زیر صدارت این سی او سی کا اجلاس ہوا جس میں کورونا کیسز اور ویکسینیشن مہم کی صورتحال پر غور کیا گیا۔
اجلاس میں ٹی ٹوئنٹی میچز کے لیے گراؤنڈ میں شائقین کی تعداد بڑھانے کا فیصلہ کیا گیا ہے۔
اس حوالے سے جاری مراسلے میں کہا گیا ہے کہ راولپنڈی کرکٹ اسٹیڈیم میں 50 فیصد شائقین میچ دیکھ سکیں گے، ویکسینیٹڈ افراد کو کرکٹ اسٹیڈیم میں میچ دیکھنے کی اجازت ہوگی۔
این سی او سی کے مطابق پی سی بی ویکسینیٹڈ افراد کو ٹکٹ اجراء کے لیے میکنزم تیار کرے گا، پی سی بی کرکٹ میچز کے لیے سیکیورٹی انتظامات کا ذمہ دار ہوگا۔
مراسلے میں کہا گیا کہ پی سی بی کرکٹ گراؤنڈ میں ایس او پیز پر عملدرآمد کی ذمہ دار ہوگی، کرکٹ اسٹیڈیم میں تماشائیوں کے لیے ماسک، سماجی فاصلہ رکھنا لازم ہوگا۔
مذکورہ مراسلہ وزارت صحت، وزارت داخلہ اور چیف سیکریٹری پنجاب کو بھی بھجوا دیا گیا ہے۔
Comments are closed.