اسلام آباد: تشدد کا شکار لڑکے، لڑکی نے شادی کر لی

وفاقی دارالحکومت اسلام آباد میں لڑکی اور لڑکے پر تشدد کے کیس میں پولیس نے متاثرہ نوجوان لڑکی اور لڑکے کے بیانات ریکارڈ کر لیے، پولیس حکام کا کہنا ہے کہ متاثرہ لڑکی اور لڑکا آپس میں شادی کر چکے ہیں۔

اسلام آباد میں ایک شخص کے لڑکی اور لڑکے پر تشدد کے واقعے کی ویڈیو میں نظر آنے والا پستول پولیس نے برآمد کر لیا ہے۔

پولیس حکام کے مطابق متاثرہ لڑکے اور لڑکی نے پولیس کو بیانات دفعہ 161 کے تحت راول پنڈی میں ریکارڈ کرائے ہیں۔

وفاقی دارالحکومت اسلام آباد میں لڑکی اور لڑکے پر ہونے والے تشدد کے واقعے کا وزیرِ اعظم عمران خان نے نوٹس لے لیا ہے۔

پولیس حکام کا کہنا ہے کہ دونوں متاثرین کے بیانات کو تفتیش کا حصہ بنا دیا گیا ہے، متاثرہ لڑکی اور لڑکا اب آپس میں شادی کر چکے ہیں۔

وفاقی دارالحکومت اسلام آباد میں لڑکی اور لڑکے پر تشدد کی ویڈیو وائرل ہونے کے بعد تشدد کرنے والے مرکزی ملزم عثمان مرزا اور اس کے ساتھی فرحان کو گرفتار کر لیا گیا ہے۔

پولیس حکام نے مزید بتایا ہے کہ متاثرہ جوڑا مکمل تحفظ اور قانونی امداد کی یقین دہانی کے بعد بیانات دینے کے لیے راضی ہوا ہے۔

وفاقی دارالحکومت اسلام آباد میں لڑکی اور لڑکے کو تشدد کا نشانہ بنانے کے واقعے کے حوالے سے وزیرِ اعظم عمران خان سے آئی جی اسلام آباد قاضی جمیل الرحمٰن نے ملاقات کی ہے۔

پولیس حکام کا یہ بھی کہنا ہے کہ واقعے میں ملوث مرکزی ملزم سمیت 4 ملزمان گرفتار ہیں، مزید افراد کی گرفتاری کی کوششیں جاری ہیں۔

بشکریہ جنگ