ایف آئی اے میں ڈیپوٹیشن پر تعینات پولیس افسر لاکھوں روپے اور ریکارڈ لے کر فرار

وفاقی تحقیقاتی ادارے ایف آئی اے میں انوکھا واقعہ رپورٹ ہوا ہے، سندھ پولیس سے ڈیپوٹیشن پر آیا پولیس افسر ادارے کی 5 قیمتی فائلیں اور لاکھوں روپے کی رقم لےکر فرار ہوگیا۔

رقم سمیت کیس پراپرٹیز جمع نہ کرانے پر سب انسپکٹر ابو عمیر کے خلاف ایف آئی اے اینٹی کرپشن سرکل میں مقدمہ درج کرلیا گیا ہے۔

مقدمہ کے مطابق کیس پراپرٹیز میں 11 لاکھ روپے سے زائد کی رقم اصل کیس فائلیں، آئی فون 14 سمیت 2 فون شامل ہیں، دیگر اشیاء میں ایک گاڑی بمعہ رجسٹریشن پیپر اور مختلف قومی شناختی کارڈز بھی شامل ہیں۔

ایف آئی اے کا کہنا ہے کہ موٹر وے کیلئے زمین خریداری میں بھی کرپشن کی شکایت پر انکوائری کا آغاز کیا گیا

ایف آئی آر کے مطابق کیس پراپرٹیز مختلف مقدمات میں نامزد ملزمان سے تحویل میں لی گئی تھیں۔

سب انسپکٹر سید ابو عمیر سندھ پولیس سے ایف آئی اے کمرشل بینک سرکل میں تعینات تھا۔

ابو عمیر منی چینجر سے ہزاروں ڈالرز ہتھیانے کے الزام میں درخشاں تھانے کے دو مقدمات میں ضمانت پر ہے، دونوں واقعات میں ابو عمیر اور دیگر کے خلاف ایک انکوائری ایف آئی اے میں بھی جاری ہے۔

ابو عمیر ان مقدمات میں نامزدگی کے باعث ایف آئی اے میں اپنی ڈیوٹی سے غیر حاضر بھی رہا۔

ابو عمیر کو غیر حاضری کے باعث 14 جولائی 2023 کو سندھ پولیس واپس جانے کے احکامات جاری کیے گئے تھے۔

بشکریہ جنگ