بابر اعظم کو بطور کپتان مزید وقت ملنا چاہیے، اظہرالدین

بھارتی کرکٹ ٹیم کے سابق کپتان محمد اظہر الدین نے قومی کرکٹ ٹیم کے کپتان بابر اعظم کی بیٹنگ سے متعلق کہا ہے کہ ہر آدمی سیکھتا ہے، بابر اعظم کو بطور کپتان مزید وقت ملنا چاہیے۔

متحدہ عرب امارات (یو اے ای) میں پاکستانی صحافیوں سے گفتگو کرتے ہوئے سابق بھارتی کپتان محمد اظہر الدین کا کہنا تھا کہ بابر اعظم کا اپنا اسٹائل ہے، مار دھاڑ ان کا کھیل نہیں ہے۔

انہوں نے کہا کہ اگر بابر اعظم مار دھاڑ کے لیے جائیں گے تو ان کا نیچرل ٹیلنٹ ضائع ہوگا۔

اظہرالدین کا کہنا تھا کہ ہر پلیئر کا اہم ہتھیار اس کا نیچرل ٹیلنٹ ہوتا ہے، اگر کوئی کھلاڑی اپنی قدرتی صلاحیت سے ہٹنے کی کوشش کرے گا تو ناکامی کا خدشہ رہے گا۔

سابق انگلش کوچ اینڈی فلاور نے قومی کرکٹ ٹیم کے کپتان بابراعظم کو تینوں فارمیٹس کے بہترین کرکٹر قرار دیا ہے۔

سابق بھارتی کپتان نے کہا کہ بابر اعظم اور محمد رضوان پاکستان کے لیے اہم کھلاڑی ہیں۔ بابر کو اپنی بیٹنگ پوزیشن کے بارے میں سوچنا پڑے گا۔ بابر اعظم اچھے پلیئر ہیں لیکن وہ قدرتی اوپننگ بیٹر نہیں ہیں۔

بابر اعظم کی کپتانی پر بات کرتے ہوئے اظہرالدین نے کہا کہ ہر آدمی سیکھتا ہے، بابر اعظم کو بطور کپتان مزید وقت ملنا چاہیے۔

انہوں نے کہا کہ اتنی جلدی کسی کپتان کو جج کرنا ٹھیک نہیں ہوتا، ہر کوئی وقت کے ساتھ سیکھتا ہے، بابر بھی سیکھ جائیں گے۔

پاکستانی بولنگ لائن سے متعلق اپنی رائے دیتے ہوئے اظہر الدین نے کہا کہ پاکستان کے بولرز کافی اچھے ہیں مگر ان کو فٹنس پر دھیان دینا ہوگا۔

 انہوں نے مزید کہا کہ انجری کے بعد اچھے سے اچھے بولرز کے لیے کم بیک کرنا مشکل ہوجاتا ہے۔

سابق بھارتی کپتان نے انگلینڈ کرکٹ ٹیم کی تعریف کرتے ہوئے کہا کہ انگلینڈ نے ان دنوں کافی اچھی کرکٹ کھیلی، انگلینڈ کی کرکٹ کو دیکھ کر کافی مزہ آیا۔

کرکٹ ورلڈکپ کی تیاری پر گفتگو کرتے ہوئے اظہرالدین کا کہنا تھا کہ ورلڈکپ میں کافی وقت ہے۔ اس سے پہلے ٹیموں کو بہت میچز کھیلنا ہیں۔

بشکریہ جنگ