14 اضلاع کے 20 حلقوں میں فول پروف سیکیورٹی انتظامات ہیں: آئی جی پنجاب

آئی جی پنجاب راؤ سردار علی کا کہنا ہے کہ پنجاب کے 14 اضلاع کے 20 حلقوں میں سیکیورٹی کے فول پروف انتظامات یقینی بنائے گئے ہیں۔

میڈیا سے گفتگو کرتے ہوئے انہوں نے کہا کہ ضمنی انتخابات کے لیے 3100 سے زائد پولنگ اسٹیشنز پر 52 ہزار اہلکار و افسران تعینات کیے گئے ہیں۔

راؤ سردار علی نے بتایا کہ خواتین کے پولنگ اسٹیشنز پر لیڈی پولیس اہلکار سیکیورٹی کے فرائض انجام دے رہی ہیں۔

لاہور کے حلقہ پی پی 158 میں مردوں اور خواتین کے لیے ایک ہی کمرے میں پولنگ اسٹیشن قائم کیا گیا ہے۔

ان کا کہنا ہے کہ لاہور کے 4 حلقوں میں 9 ہزار سے زائد اہلکار تعینات ہیں، مانیٹرنگ کے لیے سینٹرل پولیس آفس اور ضلعی سطح میں کنٹرول روم قائم کیے گئے ہیں۔

آئی جی پنجاب نے مزید بتایا کہ صوبے بھر میں ضمنی انتخابات کے دوران اسلحے کی نمائش کرنے والوں، پرائیویٹ مسلح افراد، لڑائی جھگڑا کرنے والوں کے خلاف کارروائی ہو گی۔

راؤ سردار علی کا یہ بھی کہنا ہے کہ نتائج کے اعلان کے بعد لڑائی جھگڑا اور ہوائی فائرنگ نہیں کرنے دی جائے گی۔

واضح رہے کہ پنجاب کے 20 حلقوں میں ضمنی انتخابات کے لیے پولنگ جاری ہے۔

صبح 8 بجے شروع ہونے والا ووٹنگ کا عمل بغیر کسی وقفے کے شام 5 بجے تک جاری رہے گا۔

بشکریہ جنگ