13 سالہ لڑکی نے پانی میں جادوئی کرتب دکھا کر عالمی ریکارڈ بنا لیا

امریکی اسکوبا ڈائیور نے پانی کے اندر 3 منٹ میں سب سے زیادہ جادوئی کرتب دکھا کر نیا عالمی ریکارڈ اپنے نام کرلیا۔

امریکا سے تعلق رکھنے والی 13 سالہ ایوری ایمرسن فشر کو اسکوبا ڈائیونگ اور جادو سے بہت لگاؤ ہے۔

گنیز ورلڈ ریکارڈز کی جانب سے فوٹو اینڈ ویڈیو شیئرنگ ایپ انسٹاگرام پر ایک ویڈیو شیئر کی گئی ہے۔

اس ویڈیو میں دیکھا جاسکتا ہے کہ ایوری ایمرسن فشر اسکوبا ڈائیونگ اور جادو میں دلچسپی ہونے کی وجہ سے پانی کے اندر صرف 3 منٹ کے اندر 38  ناقابل یقین جادوئی کرتب دکھانے میں کامیاب رہیں۔ 

اُنہوں نے یہ ریکارڈ11 نومبر کو کیلیفورنیا کے شہر سان فرانسسکو میں واقع ’ایکویریم آف دی بے‘ میں بنایا۔

ایوری ایمرسن فشر نے جب یہ ریکارڈ بنایا تو ایکویریم کا درجہ حرارت  14 ڈگری سینٹی گریڈ تھا اور ان کے ارد گرد مچھلیاں بھی تھیں۔

واضح رہے کہ اس سے قبل یہ ریکارڈ برطانوی جادوگر مارٹن ریس کے پاس تھا جنہوں نے 2020ء میں پانی کے اندر 20 جادوئی کرتب دکھا کر یہ ریکارڈ بنایا تھا۔

بشکریہ جنگ