ہمارے ایم پی اے کو مبینہ طور پر 40 کروڑ روپے دے کر ترکی پہنچا دیا گیا، فواد چوہدری

پاکستان تحریک انصاف ( پی ٹی آئی) کے رہنما فواد چوہدری کا کہنا ہے کہ ہمارے ایم پی اے مسعود مجید کو مبینہ طور پر 40 کروڑ روپے دے کر ترکی پہنچا دیا گیا ہے۔

وزیراعلیٰ پنجاب کے انتخاب سے پہلے حکمران اتحاد اور پی ٹی آئی کے ایک دوسرے پر ہارس ٹریڈنگ کے الزامات سامنے آگئے۔

پی ٹی آئی چیئرمین نے کہا کہ آصف زرداری کرپشن سے لوٹی رقم سے لوگوں کو خرید رہے ہیں، آصف زرداری کو جیل میں ہونا چاہیے۔

فواد چوہدری نے کہا کہ ہمارے ایم پی ایز کو 35، 35 کروڑ روپے کی پیش کش کی جا رہی ہے، تین ایم پی ایز نے پارٹی کو آگاہ کیا کہ پیسوں کی آفر ہوئی ہے۔

پی ٹی آئی رہنما نے الزام لگایا کہ یہ پیسے زرداری صاحب دے رہے ہیں، کراچی میں نالے کھولنے کے لیے ان کے پاس پیسے نہیں لیکن ہمارے ایم پی اے کو کروڑ روپے دیے جا رہے ہیں۔

فواد چوہدری نے کہا کہ آصف زرداری، رانا ثناء اور عطاء تارڑ کو گرفتار کر کے جیل میں ڈالا جائے، ہمارا مطالبہ ہے کہ سپریم کورٹ اس معاملے کی فوری انکوائری کروائے۔

بشکریہ جنگ