کوئٹہ دھماکا خودکش ہو سکتا ہے، بلوچستان پولیس

ترجمان بلوچستان پولیس نے بتایا ہے کہ سی ٹی ڈی نے بم دھماکے کی ابتدائی تحقیقات شروع کر دی ہیں، ابتدائی شواہد کے مطابق یہ خودکش دھماکا ہو سکتا ہے۔

بلوچستان پولیس کے جاری کردہ بیان کے مطابق اب تک کے شواہدکے مطابق یہ خودکش دھماکا ہو سکتا ہے، بم گاڑی میں نصب کیا گیا تھا، ہوٹل میں داخل نہ ہوسکنے پر دہشت گرد نے پارکنگ میں ہی دھماکا کر دیا۔

ترجمان وزیراعظم آفس کا کہنا ہے کہ کوئٹہ دھماکے کے حوالے سے وزیر اعظم عمران خان رات گئے تک معاملات کی نگرانی کرتے رہے ہیں۔

پولیس نے کہا ہے کہ مزید تحقیقات ہونے اور شواہد اکٹھے ہونے پر ہی اصل حقائق سامنے آئیں گے۔

ترجمان پولیس کا کہنا ہے کہ اس طرح کی بزدلانہ کارروائیاں ترقی کےسفر میں حائل نہیں ہو سکتی، مجرمان کو جلد ہی قانون کے کٹہرے میں لایا جائے گا۔

کوئٹہ کے مقامی ہوٹل کی پارکنگ میں گزشتہ رات ہوئے دھماکے کا مقدمہ تا حال درج نہیں ہوسکا ہے۔

واضح رہے کہ وفاقی وزیر داخلہ شیخ رشید کا کہنا ہے کہ یہ کوئٹہ کا ایک محفوظ ترین علاقہ ہے، غیر ملکی بھی اسی ہوٹل میں ٹھہرتے ہیں۔ ایک گاڑی کس طرح ہوٹل کی پارکنگ میں داخل ہوئی، سیکیورٹی کی کسی قسم کی بریچ ہوئی تب ہی گاڑی اندر پہنچی، دھماکا خیز مواد گاڑی میں موجود تھا۔

کوئٹہ میں ہوٹل کی پارکنگ میں دھماکے کے 7 زخمی سول اسپتال کے ٹراما سینٹر میں زیر علاج ہیں، ایک زخمی کی حالت تشویشناک ہے۔

وفاقی وزیر اطلاعات فواد چودھری نے کہا کہ دہشت گردی سے بلوچستان کی ترقی روکنے کی کوشش کرنے والوں کو شکست ہو گی۔

بشکریہ جنگ