کراچی: سرجانی ٹاؤن سے آصف برگر کا ڈکیت گروہ گرفتار

کراچی کے علاقے سرجانی ٹاؤن میں پولیس نے کارروائی کر کے ڈکیت گروہ کو سرغنہ سمیت گرفتار کر لیا۔

اس حوالے سے پولیس کا کہنا ہے کہ ملزمان آن لائن ایپلیکیشن کے ذریعے گاڑیاں چھیننے، بینک ڈکیتی اور اسٹریٹ کرائم میں ملوث ہیں۔

پولیس نے بتایا ہے کہ گرفتار ملزمان میں آصف برگر، رمیز، عمر، دانیال، سرفراز اور علی رضا شامل ہیں، گروہ کا ایک کارندہ واجد فرار ہو گیا ہے۔

ملزمان جعلی آئی ڈی سے شہریوں کو موبائل فون اور لیپ ٹاپ خریدنے کے لیے بلا کر لوٹتے تھے۔

پولیس کا کہنا ہے کہ ملزمان کا گروہ ضلع وسطی اور غربی میں وارداتیں کرتا تھا، ملزمان کا گروہ بینک سے رقم نکالنے والے شہریوں کو بھی لوٹ چکا ہے۔

پولیس نے یہ بھی بتایا ہے کہ ملزمان نے سرجانی ٹاؤن کے سیکٹر 7 اے میں ڈکیتی میں مزاحمت پر شہری کو گولی ماری تھی۔

گرفتار ملزمان نے تیموریہ سے گاڑی اور حیدری سے موٹر سائیکل چھینی تھی، ان پر شہر کے مختلف تھانوں میں مقدمات درج ہیں۔

بشکریہ جنگ