پنجاب بھر میں فائزر ویکسین کا اسٹاک ختم

لاہور سمیت پنجاب بھر میں فائزر ویکسین کا اسٹاک ختم ہوگیا جبکہ ویکسین کی دوسری کھیپ تاحال نہیں آسکی، فائزر ویکسین کی دو ڈوز لگوا کر بیرون ملک سفر کرنے کے خواہشمند افراد رُل کر رہ گئے۔

ذرائع محکمہ صحت پنجاب کا کہنا ہے کہ 15 جولائی تک پنجاب کے 4 اضلاع میں فائزر ویکسین کی پہلی ڈوز لگتی رہی، مگر 3 روز گزر گئے فائزر ویکسین کی نئی کھیپ محکمہ صحت کو نہیں مل سکی۔

محکمہ صحت پنجاب نے کہا کہ فائزر ویکسین کی دوسری ڈوز 21 دن بعد لگنا تھی جن افراد کو فائزر ویکسین کی دوسری خوراک لگنا ہے، وہ ویکسینیشن مراکز کے چکر لگا لگا کر تھک گئےہیں۔

سیکریٹری پرائمری اینڈ سکینڈری ہیلتھ کیئر پنجاب سارہ اسلم کا کہنا ہے کہ پنجاب میں کورونا وائرس کے کیسز میں نمایاں اضافہ ہوا ہے، صرف ویکسینیشن ہی ڈیلٹا ویرینٹ کے خلاف واحد اور مؤثر علاج ہے۔

دوسری جانب فائزر ویکسین کے لیے آئےشہریوں کا کہنا ہے کہ ان کے ویزے کی مدت ختم ہو رہی ہے، نہ جانے کب فائزر ویکسین آئے اور کب انہیں لگ سکے۔

بشکریہ جنگ