وزیراعظم کا سندھ حکومت سے بنڈل جزیرے سے متعلق فیصلے پر نظر ثانی کا مطالبہ

وزیراعظم عمران خان نے سندھ حکومت سے بنڈل جزیرے سے متعلق فیصلے پر نظر ثانی کا مطالبہ کردیا۔

انہوں نے کہا کہ کراچی میں ایک جزیرہ بڑے عرصے سے ایسا ہی پڑا ہے، سمجھ میں نہیں آیا سندھ حکومت نے بنڈل جزیرے پراین او سی دے کرمنسوخ کیوں کر دیا، اس منصوبے سے سندھ میں اربوں روپے کی سرمایہ کاری ہوتی اور لوگوں کو روزگار ملتا۔

عمران خان نے کہا کہ اٹھارہویں ترمیم کے بعد وفاق سے سارا پیسہ صوبوں کے پاس چلا جاتا ہے، وفاق قرضے لےکر ملک چلاتا ہے۔

وزیراعظم عمران خان نے کہا کہ  کورونا وبا کے دوران لاک ڈاون سے دوسرے ممالک میں غریب طبقہ پس گیا، غریبوں کی بحالی کے لئے احساس پروگرام لیکر آئے، احساس پروگرام کا 33 فیصد ہم نے سندھ پر خرچ کیا۔

عمران خان نے سکھر میں کامیاب جوان پروگرام کی تقریب سے خطاب کرتے ہوئے کہا کہ اندرون سندھ آنے پر خوشی ہوئی ہے، اندرون سندھ آنا میری خواہش تھی کیونکہ یہ پاکستان کا سب سے غریب ترین علاقہ ہے۔

انہوں نے کہا کہ دورے کرتا تھا تو بلوچستان اور اندرون سندھ سب سے پیچھے لگے۔سکھر حیدرآباد موٹروے سے عوام کو بہت فائدہ ہوگا۔

وزیر اعظم عمران خان آج سندھ کا ایک روزہ دورہ کریں گے، اس اہم دورے کے حوالے سے وزیر اطلاعات سندھ ناصر حسین شاہ نے لاعلی کا اظہار کردیا۔

وزیراعظم عمران خان نے کہا کہ اندرون سندھ لوگ بنیادی سہولیات سے محروم ہیں، سندھ کے کئی علاقے آگے جانے کے بجائے پیچھے جارہے ہیں، پنجاب میں ہمارا مقابلہ مافیا کے ساتھ تھا۔

انہوں نے کہا کہ ہنر سکھادیں تو نوجوان اثاثہ بن جائیں گے، ورنہ بوجھ بنیں گے، ہم نے نوجوانوں کی تربیت پر پورا زور لگانا ہے، پوری کوشش ہے کہ نوجوانوں کو ان کے پاؤں پر کھڑا کریں۔

عمران خان نے کہا کہ نیوزی لینڈ کی کُل آبادی مشکل سے پچاس ساٹھ لاکھ جبکہ پاکستان کی بائیس کروڑ ہے، کم آبادی ہونے کے باوجود نیوزی لینڈ میں کھیلوں کے میدان پاکستان سے زیادہ ہیں۔

انہوں نے کہا کہ کراچی سے منسلک جزیرے پر ایک بڑا منصوبہ لیکر آرہے ہیں، کراچی جزیرے پر منصوبے پرچالیس ارب سرمایہ کاری ہونا تھی، سارا فائدہ تو سندھ کو ہونا تھا۔وفاق کی دلچسپی زرمبادلہ ذخائر بڑھانے اور روپیہ مضبوط کرنے میں تھی، سندھ کی حکومت نے این او سی دیکر کینسل کردیا، جس سے نقصان تو سندھ حکومت کو ہوگا۔

اس سے قبل تقریب سے خطاب کرتے ہوئے وفاقی وزیر برائے منصوبہ بندی اسد عمر نے کہا کہ پاکستان میں صرف ایک لیڈر ہے جو قومی سوچ رکھنے والا لیڈر ہے، عمران خان واحد وہ لیڈر ہے جو پورے پاکستان کا لیڈر ہے۔

اسد عمر نے کہا کہ سندھ قدرتی وسائل سے مالا مال صوبہ ہے، صوبہ سندھ کے لئے446 ارب روپے کا پیکج ہے، پاکستان کا سب سے زیادہ گیس پیدا کرنیوالا صوبہ سندھ ہے۔

انہوں نے کہا کہ سب سے زیادہ پیداوار کے باوجود سندھ کے بہت سے علاقے گیس سے محروم ہیں، جب وفاق سندھ کی خدمت کرنے کی کوشش کرتا ہے تو صوبائی حکومت رکاوٹیں ڈالتی ہے، وزیراعظم کے سندھ کے لئے پیکج میں بڑے بڑے فیصلے کئے گئے ہیں۔

اسد عمر نے کہا کہ بجلی اور گیس کی ترسیل بہتر بنانے کا 52 ارب روپے کا منصوبہ اگلے دو سال میں مکمل ہوگا، سندھ کے نوجوانوں کے لئے ڈجیٹل اسکلز پروگرام بھی شامل ہے۔

انہوں نے کہا کہ عمران خان کا مشن دبئی لندن میں جائیداد بنانا نہیں اور نہ ہی سوئس بینک اکاونٹ میں رقم جمع کرنا ہے۔

بشکریہ جنگ