نو منتخب اسپیکر آزاد کشمیر اسمبلی انوار الحق نے حلف اٹھا لیا

آزاد جموں کشمیر اسمبلی کے نو منتخب اسپیکر انوار الحق نے اپنے عہدے کا حلف اٹھا لیا ہے۔

آزاد جموں کشمیر اسمبلی کے نو منتخب اسپیکر انوار الحق سے سابق اسپیکر شاہ غلام قادر نے حلف لیا، حلف برداری کی تقریب آزاد جموں کشمیر اسمبلی میں ہوئی۔

آزاد جموں کشمیر قانون ساز اسمبلی کا اجلاس اسپیکر اسمبلی شاہ غلام قادر کی صدارت میں ہوا جس میں نو منتخب اراکین نے حلف اٹھا لیا۔

اپنا حلف اٹھانے کے بعد نئے اسپیکر انوار الحق نے سابق اسپیکر شاہ غلام قادر سے بطور رکنِ اسمبلی حلف لیا۔

نو منتخب اسپیکر آزاد کشمیر اسمبلی چوہدری انوار الحق کا تعلق پاکستان تحریکِ انصاف (پی ٹی آئی) سے ہے۔

آزاد کشمیر قانون ساز اسمبلی کے نئے اسپیکر اور ڈپٹی اسپیکر کا انتخاب آج ہو رہا ہے۔

اس سے قبل آج صبح آزاد جموں کشمیر قانون ساز اسمبلی کا اجلاس اسپیکر اسمبلی شاہ غلام قادر کی صدارت میں ہوا جس میں نو منتخب اراکین نے حلف اٹھایا تھا، شاہ غلام قادر نے نو منتخب اراکین سے حلف لیا تھا۔

آزاد کشمیر اسمبلی کے 49 نو منتخب اراکین نے حلف اٹھایا، جبکہ 3 اراکین ایوان میں حاضر نہیں ہوئے تھے۔

مسلم لیگ نون آزاد کشمیر کے صدر اور سابق وزیرِ اعظم آزاد کشمیر راجہ محمد فاروق حیدر خان کا کہنا ہے کہ نون لیگ نے بطور احتجاج حلف اٹھایا ہے، حکومتِ پاکستان نے دھاندلی کی ہے۔

مسلم کانفرنس کے قائد سردار عتیق احمد خان، پیپلز پارٹی کے جاوید اقبال بڈھانوی اور چوہدری یاسین ایوان میں حاضر نہیں ہوئے جس کی وجہ سے وہ حلف اٹھانے سے رہ گئے۔

بشکریہ جنگ