نون لیگ نے بطور احتجاج حلف اٹھایا ہے: راجہ فاروق حیدر

مسلم لیگ نون آزاد کشمیر کے صدر اور سابق وزیرِ اعظم آزاد کشمیر راجہ محمد فاروق حیدر خان کا کہنا ہے کہ نون لیگ نے بطور احتجاج حلف اٹھایا ہے، حکومتِ پاکستان نے دھاندلی کی ہے۔

مظفر آباد میں میڈیا سے گفتگو کرتے ہوئے مسلم لیگ نون آزاد کشمیر کے صدر اور سابق وزیرِ اعظم آزاد کشمیر راجہ محمد فاروق حیدر خان نے یہ بات کہی ہے۔

آزاد جموں کشمیر قانون ساز اسمبلی کا اجلاس اسپیکر اسمبلی شاہ غلام قادر کی صدارت میں ہوا جس میں نو منتخب اراکین نے حلف اٹھا لیا۔

انہوں نے کہا کہ دھاندلی کے خلاف آزاد کشمیر کے عوام کے ساتھ مل کر احتجاج کریں گے، دھاندلی کے خلاف وائٹ پیپر شائع کر رہے ہیں۔

سابق وزیرِ اعظم آزاد کشمیر راجہ فاروق حیدر خان کا کہنا ہے کہ عوام تک تمام حقائق پہنچائیں گے، تیرہویں ترمیم کا دفاع کریں گے۔

آزاد کشمیر قانون ساز اسمبلی کے نئے اسپیکر اور ڈپٹی اسپیکر کا انتخاب آج ہو رہا ہے۔

انہوں نے مزید کہا کہ حکومت کو عوامی مفادات کے خلاف اقدامات پر پوری قوت سے جواب دیں گے۔

مسلم لیگ نون آزاد کشمیر کے صدر کا یہ بھی کہنا ہے کہ انتخابات کے نتائج تسلیم نہیں کرتے، بھرپور احتجاج کریں گے۔

بشکریہ جنگ