ناردرن کیخلاف سندھ کو بارش نے فتح سے ہمکنار کردیا

نیشنل ٹی20 کپ کے 14ویں میچ میں سندھ نے ناردرن کو ڈی ایل میتھڈ کے تحت 3 رنز سے ہرادیا ہے۔

راولپنڈی کرکٹ اسٹیڈیم پر کھیلے گئے میچ میں ناردرن نے ٹاس جیت کر پہلے فیلڈنگ کرنے کا فیصلہ کیا۔

ایونٹ کی اب تک کی ناقابل شکست سندھ نے مقررہ 20 اوورز میں 7وکٹ پر 176رنز بنائے۔

شرجیل خان نے 64، سعود شکیل نے 28، کپتان سرفراز احمد نے 26 اور خرم منظور نے 15 رنز کی اننگز کھیلیں۔

ناردرن کے سلمان ارشاد، شاداب خان اور محمد موسیٰ نے 2،2 وکٹیں اپنے نام کیں جبکہ حارث روف نے ایک مخالف کھلاڑی کو پویلین کا راستہ دکھایا۔

ہدف کے تعاقب میں ناردرن نے ناصر نواز اور سرمد حمید کو میدان میں اتارا، دونوں اوپنر بالترتیب 27 اور 9 رنز بناکر پویلین لوٹ گئے۔

تیسرے آؤٹ ہونے والے کھلاڑی حیدر علی تھے جو 11 رنز ہی بناسکے۔

سندھ کے دانش عزیز، شاہنواز دھائی اور محمد حسنین نے ایک ایک وکٹ اپنے کی۔

عماد وسیم 13رنز کے ساتھ کریز پر موجود تھے، ابھی 7 اعشاریہ 3 اووز کا میچ ہی ہوا تھا اور ناردرن نے 6 وکٹ پر 63 رنز بنائے تھے کہ بارش ہوگئی اور میچ روک دیا گیا۔

بارش کے باعث میچ جاری نہ رہ سکا اور یوں سندھ نے میچ ڈی ایل میتھڈ کے تحت 3 رنز سے اپنے نام کرلیا۔

یادر ہے کہ سندھ کی ٹیم اس وقت ایونٹ میں ٹاپ پوزیشن پر ہے، جس میں 5 میں سے 4 میچز میں کامیابی اپنے نام کی ہے۔

ناردرن کی ٹیم نے بھی 5 میچز کھیلے ہیں تاہم اسے دو میں شکست کا سامنا کرنا پڑا ،جس کے باعث وہ پوائنٹس ٹیبل پر تیسری پوزیشن پر ہے۔

بشکریہ جنگ