فردوس شمیم، بلال غفار کو NA 249 سے فوری نکلنے کا حکم

الیکشن کمیشن آف پاکستان کی جانب سے پاکستان تحریکِ انصاف (پی ٹی آئی) کے اراکینِ سندھ اسمبلی فردوس شمیم نقوی اور بلال غفار کو قومی اسمبلی کے حلقے این اے 249 سے فوری نکلنے کا حکم دیا گیا ہے۔

الیکشن کمیشن کے ڈی آر اوسید ندیم حیدر نے فردوس شمیم نقوی اور بلال غفار کو قومی اسمبلی کے حلقے این اے 249 سے فوری نکلنے کا حکم دیا ہے، اس حلقے میں آج ضمنی انتخاب جاری ہے۔

پاکستان تحریکِ انصاف (پی ٹی آئی) کے رہنما فردوش شمیم نقوی کا کہنا ہے کہ کراچی کے حلقہ این اے 249 میں ہم ہر سروے کے لحاظ سے لیڈ کر رہے ہیں۔

ڈی آر او سید ندیم حیدر نے اس ضمن میں پولیس کو خط لکھ دیا ہے جس میں کہا ہے کہ پولنگ کے دوران کوئی رکنِ اسمبلی نہیں آ سکتے۔

انہوں نے مزید کہا ہے کہ فردوس شمیم نقوی کو فون پر فوری حلقے سے نکلنے کا حکم دیا ہے۔

ڈی آر اوسید ندیم حیدر نے کہا ہے کہ فردوس شمیم نقوی کو فون پر فوری حلقے سے نکلنے کا حکم دیا ہے، پولنگ کے دوران منتخب پارلیمنٹرینز کا حلقے میں آنا غیر قانونی ہے۔

ریجنل الیکشن کمشنر نے ایس ایس پی کیماڑی اور ایس ایس پی ویسٹ کو بھی اس سلسلے میں خط لکھ دیا ہے جس میں کہا گیا ہے کہ یقینی بنایا جائے کہ ارکانِ اسمبلی، سینیٹر یا وزیر این اے 249 کا دورہ نہ کریں۔

الیکشن کمیشن کی جانب سے کہا گیا ہے کہ تمام سیاسی جماعتیں ارکانِ اسمبلی کو این اے 249 کا دورہ کرنے سے روکیں، ارکانِ اسمبلی کو امیدواروں کی انتخابی مہم میں حصہ لینے سے بھی روکا جائے۔

ڈی آر اوسید ندیم حیدر نے یہ بھی کہا ہے کہ خلاف ورزی کرنے والے ارکانِ اسمبلی کے خلاف بلاامتیاز کارروائی کی جائے گی۔

بشکریہ جنگ