سندھ؛ میٹرک کے امتحانات دینے والے طلبہ کی پریشانی کم نہ ہوئی

سندھ بھر میں میٹرک کے امتحانات دینے والے طلبا و طالبات کی پریشانی کم نہ ہوسکی۔

بجلی کی لوڈشیڈنگ میں میٹرک کے طلبہ کا دہرا امتحان رہا، امتحانی مراکز میں بجلی نہ ہونے سے طلبہ کی حالت غیر ہوگئی۔

شدید گرمی اور گھنٹوں کی لوڈ شیڈنگ کے باعث امتحانی مراکز پر پانی بھی نایاب ہوگیا ہے۔

حیدرآباد میں شدید گرمی میں امتحانات کے انعقاد اور لوڈشیڈنگ سے طلباء پریشان ہوگئے۔

حیدرآباد کے ایک کالج کی ہیڈ مسٹریس کا کہنا ہے کہ امتحانی سینٹرز میں بجلی کی طویل بندش سے کئی طلباء طالبات کی طبیعت خراب ہوگئی جبکہ دو طالبات بے ہوش بھی ہوگئی ہیں۔

سندھ اور پنجاب میں بجلی کی لوڈشیڈنگ میں میٹرک کے طلبہ کا دہرا امتحان رہا، حیدرآباد، لاڑکانہ، میرپور خاص، سکھر، نوابشاہ، عمرکوٹ، تھر پارکر سمیت کئی اضلاع کے امتحانی مراکز میں بجلی نہ ہونے سے طلبہ کی حالت غیر ہوگئی۔

دوسری جانب سندھ کے کئی امتحانی مراکز میں گرمی کے ساتھ نقل کا بازار بھی گرم رہا، کہیں پرچہ آؤٹ ہو کر سوشل میڈیا پر آگیا تو کہیں فوٹو اسٹیٹ کی دکانوں پر فروخت ہوتا رہا۔

اسکولوں کے باہر غیر متعلقہ افراد کی موجودگی بھی مسئلہ بنی رہی، کئی امتحانی مراکز پر موبائل فون کا آزادانہ استعمال بھی دیکھا گیا۔

بشکریہ جنگ