جنگ لڑنے سے بچنے کیلئے جنوبی کوریا پہنچنے والے روسیوں کو داخلہ نہ ملا

یوکرین جنگ میں حکومت کی طرف سے زبردستی بھیجے جانے کے خوف سے 20 روسی شہریوں نے کشتیوں کے ذریعے جنوبی کوریا کا سفر کیا لیکن انہیں جزیرہ نما کوریا کے اس ملک میں داخلے سے روک دیا گیا۔

21 ستمبر کو روس کے صدر ولادیمیر پیوٹن نے ملک کے تمام مردوں کو جنگ کے حوالے سے متحرک ہونے کا کہا تھا۔

تب سے اب تک روس کے مرد شہری بذریعہ سڑک، ریل اور فضائی سفر کر کے یورپ، آذربائیجان اور قازقستان فرار ہو رہے ہیں۔

جنوبی کوریا کے نشریاتی ادارے کے بی ایس کے مطابق منگل کو 21 روسی ملک کی جنوبی بندرگاہوں پر چھوٹی کشتیوں میں سفر کر کے پہنچے۔

ان میں سے صرف دو افراد کو ملک میں داخلے کی اجازت ملی جبکہ حکام نے باقیوں کو شک کی بنیاد پر داخلہ نہیں دیا۔

رپورٹ کے مطابق پچھلے چند دنوں کے دوران روس سے تین کشتیاں جنوبی کوریا پہنچی ہیں، ایک میں 9 روسی مرد اور ایک خاتون بھی شامل تھیں۔

جنوبی کوریا کی وزارت انصاف کے عہدیدار نے بتایا کہ روس کے شہریوں کو ملک میں بغیر ویزا داخلے کی اجازت ہے لیکن انہیں پہلے سفری اجازت دینے والے الیکٹرانک سسٹم سے منظوری لینا ہوگی۔

بشکریہ جنگ