بھارتی شہر بنگلورو کی بلڈنگ میں آتشزدگی، ایک شخص چوتھی منزل سے کود گیا

بھارتی ریاست کرناٹک کے شہر بنگلورو کی 4  منزلہ عمارت کی چھت پر بنے کیفے میں دھماکے کے بعد آگ لگ گئی۔

 کیفے میں موجود شخص جان بچانے کے لیے چوتھی منزل سے نیچے کود گیا، خوش قسمتی سے اس کی جان بچ گئی، واقعے کی ویڈیو بھی وائرل ہوگئی ہے۔

آگ لگنے کا واقعہ ایک تجارتی عمارت میں واقع کیفے کی چوتھی منزل پر پیش آیا جس میں ایک باڈی بلڈنگ کلب اور ایک کار شوروم بھی ہے۔ آگ سے بچنے کے لیے چھت سے چھلانگ لگانے والے شخص سمیت دو افراد شدید زخمی ہوئے۔

بھارتی میڈیا کے مطابق آگ دوپہر کے قریب ‘مڈ پائپ کیفے’ میں لگی جہاں کئی ایل پی جی سلنڈر رکھے گئے تھے۔  8 فائر ٹینڈرز نے آگ بجھانے کے عمل میں حصہ لیا۔ 

پولیس کے مطابق آگ پر قابو پالیا گیا ہے، حکام کی جانب سے بتایا گیا ہے کہ اس وقت کیفے میں کوئی گاہک موجود نہیں تھا۔

بشکریہ جنگ