بابر اعظم کی ایشیا کپ کیلئے تیاری، نروشان ڈکویلا کے انکشافات

پاکستان ٹیم کے کپتان بابر اعظم کی ایشیا کپ کے لیے تیاری کے سلسلے میں لنکا پریمیئر لیگ (ایل پی ایل) میں کولمبو اسٹرائیکر کے کپتان نروشان ڈکویلا نے بابر اعظم کے حوالے سے بڑے انکشافات کردیے۔ 

نروشان ڈکویلا کا کہنا تھا کہ بابر اعظم سری لنکن کنڈیشنز میں وائٹ بال کھیل رہے ہیں جو اچھا موقع ہے، سری لنکن وکٹیں بعض اوقات مشکل ہوجاتی ہیں۔

انہوں نے کہا کہ کولمبو کی وکٹ سلو جبکہ کینڈی کی بیٹنگ کے لیے سازگار ہے، بابر اعظم ہمیشہ ہی تیار رہتے ہیں۔

نروشان ڈکویلا کا کہنا تھا کہ ورلڈکپ اور ایشیا کپ کےلیے بابر اعظم پوری طرح تیار ہیں۔ بابر اعظم ایسے بلے باز ہیں جو کسی بھی فارمیٹ میں حاوی رہتے ہیں۔

نروشان ڈکویلا کا کہنا تھا کہ ریڈ بال ہو یا وائٹ بال بابر ہمیشہ ہر چیلنج اور کنڈیشنز کے لیے تیار رہتے ہیں۔ انہوں نے ابھی سے اپنی نظریں بھارت کے خلاف میچ پر مرکوز کی ہوئی ہیں۔

ان کا کہنا تھا کہ نیٹ میں بابر ہمیشہ پیڈز باندھ کر تیار رہتے ہیں، وہ کبھی اپنے پیڈز نہیں اتارتے، نیٹ میں پریکٹس کے دوران بابراعظم لمبے سیشن تک بیٹنگ کرتے ہیں۔

نروشان ڈکویلا نے کہا کہ بابر اعظم ہمیشہ اپنے آپ کو بہتر اور آگے بڑھنے کی کوشش کرتے رہتے ہیں، بابر ایک بہترین پلیئر بننا چاہتے ہیں۔

کولمبر اسٹرائیکر کے کپتان نے کہا کہ کھلاڑی کے ساتھ ساتھ بابر اعظم ایک بہترین انسان ہیں۔ مجھے یقین ہے کہ وہ ایشیا کپ اور ورلڈکپ میں بہترین پرفارم کرکے لیڈنگ رن اسکورر ہوں گے۔

بشکریہ جنگ