امریکی ڈالر افغانستان اسمگل کرنے والے گروہ کے 9 ملزمان کراچی سے گرفتار

وفاقی تحقیقاتی ادارے (ایف آئی اے) نے کراچی میں حوالہ اور ہنڈی کے غیر قانونی کاروبار اور سرگرمیوں میں ملوث منی ایکسچینج کمپنی پر چھاپہ مار کر 9 ملزمان کو گرفتار کرلیا ہے جن کے قبضے سے کروڑوں روپے مالیت کی ملکی اور غیر ملکی کرنسی اور دیگر سامان برآمد کر لیا گیا ہے۔

ایف آئی اے کمرشل بینکنگ سرکل کراچی کے انسپکٹر ارشان الکریم کے مطابق گرفتاریاں گلشن اقبال اور صدر میں واقع کمپنی کے دفاتر سے ہوئیں۔

عدالت نے وقار وصی کو 20 مارچ 2018 کو جہیز کا سامان واپس کرنے کا حکم سنایا تھا۔

گرفتار ملزمان میں کمپنی ڈائریکٹر محمد یاسین، منیجر محمد عدنان، جبکہ دیگر اسٹاف ممبران محمد معراج، اسامہ، کاؤنٹر ٹیلر، جونیئر آفیسر فہد لمادا، محمد اطہر محبوب، کیش کیریئر سیف الدین اور ثناء اللّٰہ شامل ہیں۔

تفتیشی افسر ارشان الکریم کے مطابق ملزمان کرنسی کے کاروباری لائسنس کی آڑ میں حوالہ ہنڈی کے غیرقانونی کاروبار اور سرگرمیوں میں ملوث تھے۔

ملزمان کے قبضے سے حوالہ ہنڈی میں استعمال کی گئی اشیاء موبائل فون، لیپ ٹاپ اور دیگر دستاویزات برآمد کرکے ضبط کرلی گئی ہیں۔

تفتیشی افسر کے مطابق ملزمان بلوچستان کے شہریوں کو غیر قانونی طور پر بغیر رسید اور انٹری امریکی ڈالر فراہم کر رہے تھے۔

موقع واردات پر موجود گرفتار دو اشخاص سیف الدین اور ثناء اللّٰہ دونوں کوئٹہ کے رہائشی ہیں اور امریکی ڈالر افغانستان پہنچایا کرتے تھے۔

ملزمان سے مجموعی طور پر پاکستانی کرنسی 76 لاکھ روپے، 30 لاکھ روپے مالیت کی غیر ملکی کرنسی اور 36394 امریکی ڈالر برآمد کرکے قانون کے مطابق ضبط کر لیے گئے۔

تفتیشی افسر کا کہنا ہے کہ ملزمان افغانستان کی سیاسی صورت حال کا فائدہ اٹھاکر ڈالر کی غیر قانونی منتقلی سے پاکستانی روپے کی قدر کو نقصان پہنچا رہے تھے۔

ملزمان ڈائریکٹر محمد یاسین، کمپنی سی ای او ارجمند فاروق و دیگر کے خلاف مقدمہ الزام نمبر 16/2021 اور 17/202 زیر دفعہ 4، 5،23, FER Act 1947، کے تحت درج کر لیے گئے ہیں، ملزمان سے مزید تفتیش جاری ہے۔

بشکریہ جنگ