اسلام آباد میں مزید 78 شہری ڈینگی سے متاثر

اسلام آباد میں 24 گھنٹوں میں مزید 78 شہری ڈینگی سے متاثر ہوگئے، دیہی علاقوں میں 46 اور شہری علاقوں میں 32 ڈینگی کیسز رپورٹ ہوئے۔

ڈی ایچ او زعیم ضیاء کا کہنا ہے کہ اسلام آباد میں اس وقت کُل 1229 افراد ڈینگی میں مبتلا ہیں، اسلام آباد کے مضافاتی علاقوں میں ڈینگی شدت اختیار کر رہا ہے، اسلام آباد کے دیہی علاقوں میں 817 اور شہری علاقوں میں 412 ڈینگی کیسز رپورٹ ہوچکے ہیں۔

دوسری جانب محکمہ صحت پنجاب کے مطابق 24 گھنٹوں میں پنجاب سے ڈینگی کے 169 مریض رپورٹ ہوئے ہیں، گزشتہ روز لاہور سے ڈینگی کے 124 مریض رپورٹ ہوئے۔

محکمہ صحت کا کہنا ہے کہ راولپنڈی سے 26 اور سرگودھا سے ڈینگی کے 3 مریض رپورٹ ہوئے، رواں سال پنجاب بھر سے اب تک ڈینگی کے 3975 کنفرم کیسز سامنے آئے ہیں۔

یاسمین راشد نے کہا کہ فیصل آباد کے ٹیچنگ اسپتالوں کیلئے 9 ارب روپے کا بجٹ منظور کیا گیا ہے ۔

ڈینگی کے مریضوں کیلئے ایکسپو سینٹر میں 280 بیڈز پر مشتمل فیلڈ اسپتال فعال کر دیا گیا ہے ، وہاں پر جناح، سروسز اور میو اسپتال کا عملہ ڈیوٹی انجام دے گا ۔

پاکستان میں ایک بار پھر ڈینگی بخار نے سر اُٹھا لیا ہے، ملک بھر میں اب تک ڈینگی کے سیکڑوں کیسز سامنے آچکے ہیں جن کی تعداد زیادہ تر پنجاب میں پائی جا رہی ہے، ڈینگی پر قابو پانے کے لیے ملک بھر کے لوگوں کا احتیاطی تدابیر اختیار کرنا ضروری ہے۔

صوبہ بھر کے اسپتالوں میں ڈینگی کے 428 مریض داخل ہیں، لاہور کے اسپتالوں میں ڈینگی کے 238 مریض داخل ہیں، لاہور کے علاوہ صوبہ بھر کے اسپتالوں میں ڈینگی کے 190 مریض داخل ہیں۔

بشکریہ جنگ