غزہ کی آبادی تقریباً 20 لاکھ افراد پر مشتمل ہے اور اس علاقے کی لمبائی 41 کلومیٹر جبکہ چوڑائی دس کلومیٹر ہے۔ اس کی اطراف بحیرہ روم، اسرائیل اور مصر سے منسلک ہیں۔

غزہ اور اسرائیل کے مابین حالیہ کشیدگی کئی برسوں میں ہونے والا بدترین تشدد ہے جس نے اقوام متحدہ کو ’بڑے پیمانے پر جنگ‘ کی وارننگ دینے پر مجبور کیا۔

سنہ 1967 کی مشرق وسطیٰ کی جنگ کے دوران اسرائیل نے ماضی میں مصر کے زیر قبضہ غزہ پر قبضہ کر لیا تھا تاہم سنہ 2005 میں اسرائیل نے اپنی فوج اور تقریباً 7000 کے قریب آباد کاروں کو یہاں سے نکال لیا تھا۔

یہ علاقہ عسکریت پسند گروہ حماس کے زیر کنٹرول ہے جس نے سنہ 2007 کے پرتشدد فسادات کے بعد اس وقت کی گورننگ فلسطینی اتھارٹی (پی اے) کی وفادار قوتوں کو یہاں سے نکال دیا تھا۔

یہ بھی پڑھیے

غزہ گوگل پر دھندلا کیوں دکھائی دیتا ہے؟

غزہ کا ’ڈیوڈ‘: احتجاج کی علامت

غزہ پر راج کرنے والا فلسطینی عسکریت پسند گروہ حماس کیسے وجود میں آیا؟

اس کے بعد سے اسرائیل اور مصر نے عسکریت پسندوں کے خلاف حفاظتی اقدامات کے پیش نظر غزہ سے سامان اور لوگوں کی آمدورفت پر پابندی عائد کر رکھی ہے۔

سنہ 2014 میں حماس اور اسرائیل کے درمیان جھڑپیں ہوئی جبکہ مئی 2021 میں اس معاملے نے پھر سر اٹھایا ہے۔

حالیہ تشدد کیسے شروع ہوا؟

حالیہ کشیدگی اس وقت شروع ہوئی جب اسرائیل اور حماس میں کئی روز تک جاری رہنے والی کشیدگی کے بعد 10 مئی کو باقاعدہ لڑائی کا آغاز ہوا۔

یہ کشیدگی مشرقی بیت المقدس میں اسرائیل کی جانب سے چند فلسطینی خاندانوں کو اپنے گھروں سے نکالنے کرنے کے کوششوں کے بعد شروع ہوئی تھی۔

لڑائی کے دوران اسرائیل کی جانب سے درجنوں فضائی حملے کیے گئے جبکہ حماس کی جانب سے بھی اسرائیل پر راکٹ فائر کیے گئے۔

راکٹ حملوں سے بجلی منقطع

غزہ میں روزانہ کی بنیاد پر بجلی کا جانا ایک معمول ہے۔ حالیہ تشدد سے پہلے بھی غزہ میں مخلتف اوقات کے دوران صرف آٹھ گھنٹے ہی بجلی فراہم کی جاتی تھی۔

حالیہ کشیدگی کے بارے میں کہا جا رہا ہے کہ اس دوران بجلی کی لائنوں کو نقصان پہنچا ہے اور ایندھن کی رسد میں خلل پڑا ہے۔

اقوام متحدہ کے دفتر اوچا یعنی کوآرڈینیشن آف ہیومینٹیرین افئیرز( OCHA) کے مطابق غزہ میں اب زیادہ تر گھروں کو دن بھر میں صرف تین گھنٹے ہی بجلی فراہم کی جا رہی ہے۔

غزہ کی پٹی پر زیادہ تر بجلی اسرائیل کی طرف سے آتی ہے جبکہ اس میں مزید حصہ غزہ کے واحد پاور پلانٹ کا ہے اور مصر سے بھی تھوڑی مقدار میں بجلی یہاں مہیا کی جاتی ہے۔

لیکن غزہ کا پاور پلانٹ (جی پی پی) اور بہت سارے لوگوں کے انفرادی جنریٹر ڈیزل پر انحصار کرتے ہیں لیکن اسرائیل کے راستے لائی جانے والی اس سپلائی میں اکثر خلل ڈالا جاتا ہے۔

بند سرحدیں

سنہ 2007 میں حماس کے غزہ میں برسر اقتدار آنے کے بعد مصر نے غزہ کے ساتھ بڑی حد تک اپنی سرحد کو بند کر رکھا ہے اور گذشتہ برس کورونا وائرس کی وبا پر قابو پانے کے لیے مزید پابندیاں لگائی گئی ہیں۔

اوچا کے مطابق غزہ کو مصر سے ملانے والی سرحد رفح اور اسرائیل سے ملانے والی سرحد ایریز دونوں کو سنہ 2020 میں 240 دن بند جبکہ 125 دن کے لیے کھولا گیا۔

سنہ 2019 میں بذریعہ رفح 78 ہزار افرد نے غزہ چھوڑا لیکن سنہ 2020 میں یہ تعداد صرف 25 ہزار رہی۔

دوسری جانب ایریز کی سرحد پر بھی کچھ ایسا ہی ہوا اور اس برس اس سرحد کو پار کرنے والے افراد کی تعداد صرف آٹھ ہزار رہی جن میں سے زیادہ تر مریض یا ان کی دیکھ بھال کے لیے ان کے ساتھ جانے والے لوگ تھے۔

حالیہ تشدد کے بعد ان سرحدوں پر دوبارہ رش دیکھا گیا ہے، امدادی کاموں کے لیے آنے والے قافلوں کو اجازت دی گئی ہے تاہم یہ سرحدیں بند ہی رہی ہیں۔

سرنگوں پر حملہ

اقوام متحدہ کے مطابق غزہ کی تقریباً 80 فیصد آبادی بین الاقوامی امداد پر جبکہ تقریباً دس لاکھ لوگ روزانہ کھانے کے لیے بھی امداد پر ہی انحصار کرتے ہیں۔

اسرائیل کی طرف سے عائد کردہ ناکہ بندی نے غزہ میں اور اس سے نقل و حرکت اور تجارت کو بری طرح متاثر کیا ہے۔

اس ناکہ بندی سے نمٹنے کے لیے حماس نے سرنگوں کا ایک نیٹ ورک تعمیر کر رکھا ہے جس کے ذریعے غزہ میں اشیا لائی جاتی ہیں۔

اسرائیل کا کہنا ہے کہ یہ سرنگیں عسکریت پسندوں کے زیر استعمال ہیں اور فضائی حملوں میں انھیں نشانہ بنایا گیا ہے۔

غزہ کی معاشی حالت پر کورونا وائرس کی وبا بھی اثر انداز ہوئی ہے لیکن ورلڈ بینک کے مطابق حالیہ لڑائی سے قبل اس میں بہتری نظر آنا شروع ہوئی تھی۔

ٹوٹے پھوٹے گھر اور رش

اقوام متحدہ کے مطابق غزہ میں لگ بھگ چھ لاکھ مہاجرین آٹھ پرہجوم کیمپوں میں رہائش پذیر ہیں۔

اوسطاً فی مربع کلومیٹر میں 5،700 سے زیادہ افراد ہیں لیکن یہ تعداد غزہ شہر میں 9000 سے بھی زیادہ ہے۔

اسرائیل نے عسکریت پسندوں کے راکٹ حملوں سے خود کو بچانے کے لیے سنہ 2014 میں سرحد کے ساتھ ایک بفرزون کا اعلان کیا تھا۔ اس زون نے لوگوں کی رہائش اور کھیتی باڑی کے لیے دستیاب اراضی کو کم کر دیا۔

اقوام متحدہ کے اندازے کے مطابق سنہ 2014 کے تشدد میں تقریباً ایک لاکھ چالیس ہزار گھر تباہ ہوئے تھے جس کے بعد اقوام متحدہ نے تقریباً 90 ہزار خاندانوں کو دوبارہ گھر بنانے میں مدد کی۔

حالیہ تشدد میں بھی سینکڑوں گھروں کو شدید نقصان پہنچا ہے لیکن تباہی کا صحیح اندازہ ابھی کچھ وقت بعد ہی ہو گا۔

صحت کی سہولیات

غزہ میں صحت کا نظام کئی وجوہات کی وجہ سے خطرناک صورتحال سے دوچار ہے۔ اقوام متحدہ کے دفتر کوآرڈینیشن آف ہیومینٹیرین افئیرز( OCHA) کے مطابق اسرائیل اور مصر کی جانب سے ناکہ بندیوں، فلسطینی اتھارٹی کی جانب سے صحت کے شعبے میں کم خرچ، فلسطینی اتھارٹی کے اندرونی سیاسی اختلافات اور حماس سب فلسطینی علاقوں میں صحت کے ناقص نظام کے ذمہ دار ہیں۔

اقوام متحدہ صحت کی دیکھ بھال کی 22 سہولیات کو چلانے میں مدد فراہم کرتی ہے لیکن کئی ہسپتال اور کلینک پچھلے تنازعات میں تباہ ہو چکے ہیں۔

غزہ سے مغربی کنارے اور مشرقی یروشلم کے ہسپتالوں میں علاج کے لیے جانے والے افراد کو پہلے فلسطینی اتھارٹی سے اپنی درخواستوں کی منظوری لینی پڑتی ہے جس کے بعد اسرائیلی حکومت سے ایگزٹ پاس کی ضرورت ہوتی ہے۔

سنہ 2019 میں غزہ کی پٹی سے جانے والے مریضوں کی درخواستوں کی منظوری کی شرح 65 فیصد تھی۔

گذشتہ کچھ ماہ میں کورونا وائرس کی وجہ سے بھی غزہ میں صحت کی صورتحال مزید خراب ہوئی ہے۔

اپریل میں غزہ میں کورونا وائرس کے یومیہ تین ہزار کیس سامنے آ رہے تھے۔ وبا کے آغاز سے اب تک غزہ میں کورونا وائرس کے ایک لاکھ چار ہزار نئے کیس سامنے آ چکے ہیں جبکہ 946 افراد اس وائرس سے ہلاک ہوئے ہیں۔

عالمی ادارہ صحت (ڈبلیو ایچ او) نے خبردار کیا ہے کہ سرحدی پابندیاں نہ صرف متاثرہ افراد کی جان بچانے والے علاج تک رسائی کو محدود کر رہی ہیں بلکہ وہ کورونا وائرس کے ردعمل میں بھی رکاوٹ ہیں۔

ڈبلیو ایچ او کا کہنا ہے کہ اس سے ویکسینیشن کا پروگرام متاثر ہو رہا ہے اور وائرس پھیلنے کے خطرے میں بھی اضافہ ہوتا ہے کیونکہ لوگ رشتے داروں یا ہنگامی پناہ گاہوں میں پناہ لیتے ہیں۔

امدادی قافلوں کی راہ میں رکاوٹ

اقوام متحدہ کے مطابق بین الاقوامی امداد کے باوجود غزہ میں دس لاکھ سے زیادہ افراد کھانے پینے کے حوالے سے عدم تحفظ کا شکار ہیں۔

امدادی قافلوں کے گزرنے کے لیے سرحد کھول دی گئی ہے لیکن گولہ باری سے اس فراہمی کی راہ میں خلل پڑا ہے۔

زرعی اراضی اور مچھلی پکڑنے تک پر اسرائیلی پابندیوں کی وجہ سے غزہ کے شہری خود خوراک پیدا کرنے سے بھی محروم ہیں۔

فلسطینی اسرائیل کی طرف سے بفر زون قرار دیے گئے علاقے میں کاشت کاری نہیں کر سکتے، یہ بفر زون غزہ کی سرحد کی جانب 1.5 کلومیٹر پر محیط علاقہ ہے۔ بفر زون میں کاشت کاری کی اجازت نہ ہونے کے باعث پیداوار 75 ہزار ٹن کم ہوتی ہے۔

اسرائیل نے ماہی گیری کو بھی محدود کر رکھا ہے اور غزہ کے شہری صرف ساحل کے ایک خاص فاصلے سے ہی مچھلی کا شکار کر سکتے ہیں۔ اقوام متحدہ کا کہنا ہے کہ اگر یہ پابندی ختم کر دی گئی تو ماہی گیری سے غزہ کے عوام کو روزگار اور پروٹین کا ایک سستا ذریعہ مل سکتا ہے۔

حالیہ کشیدگی کے بعد اسرائیل نے عزہ کی پٹی سے ماہی گیری پر عارضی پابندی عائد کر دی ہے۔

گذشتہ کئی برسوں میں اسرائیل نے ماہی گیری کے زون پر مختلف حدیں مقرر کی ہیں، جس سے تقریباً پچاس ہزار ماہی گیروں اور اس سے متعلقہ افراد کا ذریعہ معاش متاثر ہوا ہے۔

پانی کی قلت معمول ہے

غزہ میں زیادہ تر لوگوں کو پانی کی قلت کا سامنا ہے۔ نلکے سے آنے والا پانی نمکین اور آلودہ ہونے کی وجہ سہ پینے کے قابل نہیں۔

غزہ کے زیادہ تر گھروں میں پائپ کے ایک نیٹ ورک کے ذریعے پانی پہنچتا ہے تاہم اوچا ( (OUCHAکے مطابق سنہ 2017 میں یہاں رہنے خاندانوں کو ہر چار روز بعد صرف چھ سے آٹھ گھنٹے کے لیے پانی دستیاب ہوتا تھا اور حالیہ حملوں کے بعد اس میں مزید کمی آئی ہے۔

عالمی ادارہ صحت نے روزانہ کی ضروریات کے لیے فی شخص کم از کم 100 لیٹر پانی کی حد مقرر کی ہے تاہم غزہ میں اوسطاً کھپت 88 لیٹر ہے۔

نکاسی آب ایک اور مسئلہ ہے۔ اوچا کا کہنا ہے کہ بحیرہ روم میں روزانہ ایک سو میلن لیٹر سے زیادہ گندہ پانی پمپ کیا جاتا ہے۔

اس مسئلے سے نمٹنے کے لیے سنہ 2021 کے آغاز میں گندے پانی کو صاف کرنے کا ایک نیا پلانٹ شروع کیا گیا ہے۔

سکولوں کو پناہ گاہوں کے لیے استعمال کیا جا رہا ہے

غزہ میں اقوام متحدہ کے سکولوں میں بچے تعلیم حاصل کر رہے ہیں جبکہ حالیہ بمباری کے بعد کئی سکولوں کو پناہ گاہوں کے طور پر استعمال کیا جا رہا ہے۔

فلسطین کی مہاجر ایجنسی ( UNRWA) کے مطابق 275 سکولوں میں سے 65 فیصد ’ڈبل شفٹ‘ پر کام کر رہے ہیں جہاں کچھ بچے صبح کے وقت تو کچھ شام کے وقت پڑھتے ہیں۔

سنہ 2019 میں ایک کلاس کا اوسط سائز تقریباً 41 بچے تھے۔ 15 سے 19 برس کے نوجوانوں میں شرح خواندگی اب 99 فیصد ہے، جس میں گذشتہ کچھ برسوں میں تیزی سے اضافہ دیکھنے میں آیا ہے۔

نوجوانوں میں بے روزگاری

سی آئی اے فیکٹ بک کے مطابق غزہ دنیا کی سب سے کم عمر آبادی میں سے ایک ہے، جس کی آبادی کا تقریباً 65 فیصد حصہ 25 برس سے کم عمر ہے لیکن بہت سے نوجوان بے روزگار ہیں۔

اقوام متحدہ کے دفتر کوآرڈینیشن آف ہیومینٹیرین افئیرز کی ایک رپورٹ کے مطابق سنہ 2020 میں نوجوانوں میں بے روزگاری کی شرح 70 فیصد تھی جس کی ایک وجہ کورونا وائرس کی وبا بھی ہے۔