پی ٹی آئی کا شیر افضل مروت کی گرفتاری کا دعویٰ، کے پی پولیس کی تردید

پاکستان تحریک انصاف (پی ٹی آئی) نے سینئر نائب صدر شیر افضل مروت کو گرفتار کیے جانے کا دعویٰ کیا ہے جبکہ خیبر پختونخوا پولیس نے گرفتاری کی تردید کی ہے۔

 نائب صدر پی ٹی آئی خیبر پختونخوا ظاہر شاہ طورو کا اس حوالے سے کہنا ہے کہ شیر افضل مروت کو گرفتار کرنے کی کوشش کی گئی، پولیس نے شیرافضل مروت کو چھوڑدیا۔

 ظاہر شاہ طورو نے کہا کہ شیر افضل مروت اس وقت محفوظ مقام پر ہیں،  انتخابی مہم جاری رکھیں گے۔

اس سے قبل تحریک انصاف کا کہنا تھا کہ بانی پی ٹی آئی کے وکیل شیر افضل مروت کو چکدرہ سے اغوا کیا گیا، شیر افضل مروت باجوڑ کنونشن میں شرکت کے لیے جا رہے تھے۔

ترجمان پی ٹی آئی معظم بٹ کا کہنا تھا کہ ہم شیر افضل مروت کی رہائی کا مطالبہ کرتے ہیں، غیر قانونی گرفتاریوں اور اغوا کے معاملے کا جلد نوٹس لیا جائے۔

ڈپٹی انسپکٹر جنرل (ڈی آئی جی) ملاکنڈ نے پاکستان تحریک انصاف کے دعوے کی تردید کرتے ہوئے کہا تھا کہ شیر افضل مروت کو گرفتار نہیں کیا گیا ہے۔

بشکریہ جنگ