پرویز الہٰی کو کسی بھی کیس میں گرفتار نہ کرنیکے حکم پر عملدرآمد کرانے کی استدعا

سابق وزیر اعلیٰ پنجاب کے وکیل کی جانب سے استدعا کی گئی ہے کہ عدالت پرویز الہٰی کو کسی بھی کیس میں گرفتار نہ کرنے کے حکم پر عملدرآمد کرائے۔

پرویز الہٰی کو کسی بھی مقدمے میں گرفتار نہ کرنے کے حکم پر عملدرآمد کرانے کے کیس کی لاہور ہائی کورٹ میں سماعت ہوئی۔

لاہور ہائی کورٹ نے کہا کہ اس درخواست میں تو نیب کو بھی فریق بنایا گیا ہے، سنگل بینچ نیب کیس کی کیسے سماعت کر سکتا ہے۔

پرویز الہٰی کے وکیل نے کہا کہ جو کیس نیب عدالت سے آئے وہ دو رکنی بینچ سماعت کرے گا۔

نیب پراسیکیوٹر نے کہا کہ سنگل بینچ نیب کیس سماعت نہیں کر سکتا، جس پر لاہور ہائی کورٹ نے کہا کہ آپ بھی اپنا تحریری جواب عدالت میں جمع کرائیں، فریقین کو سن کر آئین اور قانون کے مطابق فیصلہ کریں گے۔

عدالت نے درخواست پر سماعت 4 اکتوبر تک ملتوی کر دی۔

بشکریہ جنگ