پانچواں ون ڈے: نیوزی لینڈ کا پاکستان کو 300 رنز کا ہدف

نیوزی لینڈ نے سیریز کے پانچویں اور آخری ون ڈے میں پاکستان کو جیت کے لیے 300 رنز کا ہدف دے دیا۔ 

کراچی کے نیشنل بینک کرکٹ ایرینا میں کھیلے جانے والے اس میچ میں نیوزی لینڈ نے ٹاس جیت کر پہلے بیٹنگ کرنے کا فیصلہ کیا۔ 

نیوزی لینڈ کی ٹیم پہلے بیٹنگ کرتے ہوئے آخری اوور میں 299 رنز بنا کر آل آؤٹ ہوگئی۔ 

مہمان ٹیم کی جانب سے اوپنر ول ینگ نے 87 اور کپتان ٹام لیتھم نے 59 رنز کی اننگز کھیلی۔ 

اس ینگ ٹیم کے دیگر کھلاڑیوں نے بھی ٹوٹل میں اپنا حصہ ڈالا جس میں مارک چیپمین نے 43 رنز بنائے جبکہ رچن رویندرا نے 28، کول میک کونچی نے 26 اور ہینری نکولس نے 23 رنز کی اننگز کھیلی۔  

شاہین آفریدی پانچویں میچ میں پاکستان کے بولنگ یونٹ کے کامیاب بولر ٹھہرے، انہوں نے 46 رنز دے کر 3 وکٹیں حاصل کیں۔ 

انکے علاوہ اسامہ میر اور شاداب خان نے دو دو جبکہ حارث رؤف اور محمد وسیم نے ایک ایک آؤٹ کیا۔

ٹاس کے بعد گفتگو کرتے ہوئے کپتان بابر اعظم نے کہا ہے کہ کراچی اسٹیڈیم کی وکٹ دوسری اننگز میں بیٹنگ کے لیے اچھی ہو جاتی ہے۔

بابر اعظم نے کہا کہ کوشش ہو گی کہ اپنے مومینٹم کو برقرار رکھیں اور آج کا میچ جیت کر کلین سوئپ کریں۔

پاکستان ٹیم میں بابر اعظم، شان مسعود، محمد رضوان، فخر زمان، افتخار احمد، آغا سلمان، شاداب خان، اسامہ میر، شاہین آفریدی، ویسم جونیئر اور حارث رؤف شامل ہیں۔

واضح رہے کہ پاکستان کو 5 ون ڈے میچوں کی سیریز میں چار صفر کی برتری حاصل ہے۔

اس سے قبل دونوں ٹیموں کے درمیان 5 ٹی ٹوئنٹی میچوں کی سیریز  2-2 سے برابر ہوئی تھی۔

بشکریہ جنگ