امریکا: سپر اسٹور میں فائرنگ سے مسلح شخص سمیت متعدد افراد ہلاک

امریکی ریاست ورجینیا کے چیسپیک میں واقع وال مارٹ سپر اسٹور میں مسلح شخص نے فائرنگ کرکے 10 افراد کو ہلاک، جب کہ متعدد کو زخمی کردیا۔

غیر ملکی میڈیا رپورٹس کے مطابق گزشتہ رات پیش آنے والے واقعے میں پولیس نے کم از کم 10 افراد کی ہلاکت کی تصدیق کی ہے، جس میں حملہ آوار بھی شامل ہے۔

مائیکرو بلاگنگ سائٹ پر چیساپیک کی صحافی نے ٹوئٹ میں بتایا کہ وال مارٹ میں فائرنگ سے کئی افراد ہلاک اور زخمی ہونے کی اطلاعات موصول ہوئی تھیں، جس پر پولیس فوراً جائے وقوع پر پہنچی اور وال مارٹ اور اطراف کا علاقہ سیل کیا۔

پولیس ذرائع کے مطابق کئی افراد زخمی ہیں جنہیں فوری طور پر قریبی اسپتال منتقل کردیا گیا ہے۔

پولیس ذرائع کے مطابق تھینکس گیونگ کی چھٹیوں کے دوران یہ دوسرا واقعہ ہے، جس کی اطلاعات گزشتہ رات تقریباً 10 بجے موصول ہوئیں تھیں۔

تاہم پولیس حکام کے مطابق یہ ابھی تک معلوم نہیں ہو سکا ہے کہ حملہ آور کس کی گولی سے ہلاک ہوا ہے۔ 

البتہ یہ تصدیق کی گئی ہے کہ پولیس پر کوئی فائر نہیں کیا گیا ہے۔

پولیس کا مزید کہنا ہے کہ واقعہ کی تحقیقات جاری ہیں، فی الحال حملہ آور سے متعلق کچھ نہیں بتا سکتے۔

بشکریہ جنگ