برطانیہ میں پرانے زمانے میں شہروں یا محلوں میں ’ایبی‘ یا خانقاہیں ہوتی تھیں۔ یہ چرچ سمیت دیگر چند عمارات کا مجموعہ ہوتی تھیں جس میں مسیحی منکس یا راہب رہتے تھے۔ ایبی مکمل طور پر خودمختار ہوتی تھی اور اس کا سربراہ ایک ایبٹ ہوتا تھا۔

یہ برطانیہ کا ایک اہم ثقافتی ورثہ ہے۔ اسی وجہ سے جب ایک مقامی محقق نے جب اپنے قصبے کی ایک ایبی پر تحقیق شروع کی تو وہ یہ توقع کر رہے تھے کہ کچھ دلچسپ اور حیران کر دینے والے حقائق ان کے سامنے آئیں گے لیکن ایک مذہبی کردار کی جرائم پیشہ زندگی ان کے وہم و گمان میں بھی نہیں تھی۔

ایک خطرناک اور قابو سے باہر راہب ’جان آف ٹنٹرن‘ کی زندگی انتی رنگین اور جرائم سے بھری تھی کہ محقق ٹونی میک الیوی کے لیے یہ مجبوری بن گئی کہ وہ اس کردار کے ساتھ انصاف کرتے ہوئے اس پر ایک کتاب لکھیں۔

مالمسبری کاٹس وولڈز کا ایک خوبصورت شہر ہے۔ اس کی تاریخی اہمیت یہ بھی ہے کہ یہاں اینگلو سیکسن بادشاہ ایتھلسٹین کی قبر ہے۔ لیکن یہ جگہ ہمیشہ سے خاموش اور پرسکون نہیں تھی۔

شاہ ہینری ہشتم کی متعارف کروائی گئی مذہبی تبدیلیوں کی وجہ سے یہاں پر موجود یہ خانقاہ تحلیل ہو گئی تھی لیکن اس سے پہلے کئی صدیوں تک یہ جگہ علم کا مرکز تھی اور اس مذہبی ادارے کے پاس سیاسی اثرورسوخ بھی تھا۔

بی بی سی ریڈیو ولٹ شائر سے بات کرتے ہوئے میک الیوی نے بتایا کہ جان آف ٹنٹرن کا ’وسیح جرائم کا ریکارڈ‘ تھا اور اس کا آغاز سن 1318 میں ہوا تھا۔

اس کہانی کو نکالنے کے لیے میک الیوی کو صدیوں پرانے دستاویز کے امبار سے گزرنا پڑا۔

ایک چھوٹی فوج کے سرغنہ

اس سال جان ایک نوجوان راہب تھے انھیں شاہ ایڈورڈ دوم کے سامنے لایا گیا کیونکہ ان پر الزام تھا کہ انھوں نے بلوہ شروع کیا ’لیچلیڈ قصبے میں ایک اجتماعی جھگڑا ہوا جس میں وہ مالمسبری کے 40 آدمیوں کے ساتھ وہاں گئے تھے۔ وہ ایک چھوٹی سی فوج تھی جھگڑا زمین اور پیسے کے نتازعے پر بحث سے شروع ہوا تھا۔‘

ایبی میں بڑی تعمیرات کا آغاز ہونا تھا اور انھیں اس کے لیے پیسے درکار تھے لہٰذا ’یہ ایسے شخص نہیں تھے جو اپنا سارا وقت عبادت میں گزارتے تھے، وہ ایک کاروباری شخص تھے۔‘

آج جو کچھ مالمسبری ایبی کا نظر آتا ہے یہ تاریخ کے اُن لمحات کی وجہ سے ہے۔ اس ایبی کا اوپر والا حصہ اس وقت تعمیر کیا گیا جبکہ نچلا حصہ پہلے سے تعمیر شدہ تھا۔

وہاں پر موجود عمارت چھوٹی لیکن عظیم ہے اور اسے دیکھ کر یہ اندازہ لگایا جا سکتا ہے کہ ساری ایبی کیسی نظر آتی ہو گی۔ 1500 کے پیٹے میں خانقاہوں کے تحلیل ہونے کے بعد بھی یہ حصہ بطور چرچ قائم رہا۔

ایک راہب ’گینگسٹر‘

ٹونی میک الیوی کہتے ہیں اس کے باوجود کہ جان کو 1340 میں نیا ایبٹ منتخب کیا گیا وہ اپنی کارروائیوں سے باز نہیں آئے بلکہ ان کا عمل بدتر ہوتا گیا۔

’وہ ایک گینگسٹر کی طرح کام کرتے تھے، ایک ایسے گینگسٹر جو اپنے حریفون کا قتل کرنے کے لیے بھی تیار تھے۔‘

صرف ان کے جرائم ہی ان کا ایسا عمل نہیں تھا جو ان کے راہب کے کردار سے متضاد تھا، ان کے ایک عورت مارگریٹ آف لی کے ساتھ تعلقات تھے اور یہ کوئی چھپی ہوئی بات نہیں تھی۔

ان پر الزام تھا کہ انھوں نے مارگریٹ اور ان کے خاوند کے بنگلے کو جلایا اور وہاں سے خاتون کو اغوا کر کے اپنے پاس رکھ لیا۔

محسوس ہوتا ہے کہ قصبے میں یہ قصہ بہت مشہور تھا کیونکہ جب لندن سے مالمسبری کی طرف ججوں نے سفر کیا تو مقامی لوگوں نے اس جرم کے متعلق ان کو شکایت کی۔

تاہم جان آف ٹنٹرن صرف آگ لگانے اور اغوا کرنے کے لیے مشہور نہیں تھے ان پر الزام تھا کہ وہ قتل کے چار معاملات میں بھی ملوث تھے۔

جن لوگوں کو انھوں نے قتل کروایا وہ زمین دار تھے ان میں سے کچھ ایبی کی زمین پر کرایہ دار تھے اور ’لگتا ہے کہ جان ان کو ٹھکانے لگانا چاہتے تھے تاکہ وہ زمین اپنے حواریوں کو دے سکیں۔‘

اور بدعنوانی مزید سنگین ہو جاتی ہے جب علاقے میں قانون نافذ کرنے والے ولٹ شائر کے شیرف گلبرٹ آف بروک خود ان جرائم میں جان کا ساتھ دیتے ہیں۔

جب یہ قتل ہوئے تو جان خود اس وقت علاقے میں نہیں تھے بلکہ انھوں نے مارپیٹ اور قتل کے کام قریب کے علاقے میں رہنے والے ایک شخص سے کروائے۔

اس کے بعد جان کی گرفتاری کے وارنٹ جاری ہوئے، وہ اور مارگریٹ دونوں بھاگ گئے۔

ٹونی میک الیوی کہتے ہیں کہ اس کے بعد زیادہ معلومات نہیں ہیں کہ کیا ہوا اتنا پتا ہے کہ وہ مل گئے تھے اور انھیں لندن میں عدالت میں پیش کیا گیا۔

اس لمحے پر لگتا ہے کہ یہاں آ کر آخر کار جان آف ٹنٹرن کی کہانی کا اختتام ہو گیا ہو گا۔

’انھیں معاف کر دیا گیا‘

ٹونی میک الیوی کہتے ہیں ’وہ قتل کر کے بچ گئے۔‘

’شاہی دربار نے ان کا جرم مانا اور ان پر بڑا جرمانہ لگا کر انھیں معاف کردیا۔ بنیادی طور پر انھیں قتل کرنے پر جرمانہ کیا گیا۔‘

جرمانے کی رقم 500 پاؤنڈ تھی جو آج کے زمانے کے کئی ہزار پاؤنڈ ہوتے۔

ٹونی میک الیوی کا ماننا ہے کہ ان سب واقعات کی بڑی وجہ پیسے تھے۔ اس وقت ایبی میں بڑی تعمیرات ہو رہی تھیں اور اس کے لیے اس وقت کے بڑے آرکیٹیکٹ میں سے ایک کو ملازمت پر رکھا گیا تھا۔

’ضمیر کی ملامت‘

ویٹیکن کے پرانے دستاویزوں سے یہ شواہد ملتے ہیں کہ جان آپ ٹنٹرن کو اپنے کیے پر ملال تھا۔

انھوں نے پوپ کی خدمت میں ’انڈلجنس‘ کی درخواست دی تھی۔

ٹونی میک الیوی سمجھاتے ہیں کہ اس کا مطلب یہ ہے کہ اگر پوپ ان کی درخواست قبول کر لیتے تو ان کی موت کے وقت ان کے تمام گناہ معاف کر دیے جاتے۔

’اس وقت یہ پیسے کے بدلے ایک معمول کا لین دین تھا۔‘

ٹونی کہتے ہیں کہ ان کے خیال میں جان کے ضمیر کو ان کی وارداتوں پر ملال تھا۔

1349 میں جان آف ٹنٹرن کی وفات ہو گئی۔ اس بارے میں مصدقہ اطلاعات نہیں ہیں کہ ان کی موت کی وجہ کیا چیز بنی۔ لیکن ان سالوں میں ’بلیک دیتھ‘ کی وبا یورپ اور برطانیہ میں پھیلی ہوئی تھی اور اس کی وجہ سے کئی لاکھ لوگ مارے گئے تھے لہذا ہو سکتا ہے جان کی ہلاکت بھی اسی بیماری کی وجہ سے ہوئی ہو۔

ٹونی کو اس کہانی کی تہہ تک پہنچنے کے لیے بہت مطالعہ کرنا پڑا وہ کہتے ہیں کہ ان تاریخی دستاویزوں کو دیکتے ہوئے یقین نہیں آتا کہ ’یہ سب کیسے سچ ہو سکتا ہے؟ اس مذہبی آدمی نے اتنا ناقابل یقین حد تک برا سلوک کیسے کیا؟‘