امریکی شہر بوسٹن کے ایک ہسپتال نے ایک مریض کا ہارٹ ٹرانسپلانٹ کرنے سے صرف اس وجہ سے انکار کر دیا کیونکہ اس نے کووڈ کے خلاف تحفظ کی ویکیسن نہیں لگوائی ہوئی تھی۔

مریض کے والد ڈیوڈ کا کہنا ہے کہ 31 برس کے ڈی جے فرگوسن کو دل کے ٹرانسپلانٹ کی اشد ضرورت ہے مگر بوسٹن کے بیگھم اینڈ وویمن ہسپتال نے انھیں اپنی ہارٹ ٹرانسپلانٹ یعنی دل کی پیوند کاری کے فہرست سے نکال دیا ہے۔

مریض کے والد ڈیوڈ کا کہنا ہے کہ کووڈ ویکسین ان کے بیٹے کے بنیادی اصولوں کے خلاف تھی اور وہ اس پر یقین نہیں رکھتے تھے اس لیے انھوں نے یہ ویکسین نہیں لگوائی تھی جبکہ ہسپتال کا کہنا ہے کہ وہ صرف اپنی پالیسی پر عمل کر رہے ہیں۔

بریگھم اینڈ وویمن ہسپتال نے بی بی سی کو بتایا کہ ’انسانی اعضا کی قلت کے باعث ہم یہ یقینی بنانے کی ہر ممکن کوشش کرتے ہیں کہ جس مریض کی بھی اعضا کی پیوند کاری کی جائے اس کے زندہ رہنے یا بچنے کے زیادہ سے زیادہ امکانات ہوں۔‘

ہسپتال کے ترجمان کا کہنا تھا کہ ’ٹرانسپلانٹ کے خواہشمند مریضوں کے لیے کووڈ 19 ویکسین اور ان کی طرز زندگی کے بہتر رویے کی ضرورت ہے تاکہ کامیاب آپریشن کو ممکن بنایا جا سکے۔

ہسپتال کی جانب سے محتاط انداز میں لکھے گئے بیان سے یہ ظاہر ہوتا ہے کہ مریض کے دل کی پیوندکاری کے لیے نااہلی کی وجوہات میں کووڈ ویکسین کے علاوہ دیگر عوامل بھی شامل ہیں تاہم اس نے مریض کی پرائیوسی کو ملحوظ خاطر رکھتے ہوئے مزید تبصرہ کرنے سے انکار کر دیا۔

ہسپتال کا مزید کہنا تھا کہ تقریباً ایک لاکھ ایسے مریض ہیں جو انسانی اعضا کی پیوند کاری کے لیے اعضا کی فراہمی کے منتظر ہیں تاہم ان اعضا کی قلت کے باعث ممکنہ طور پر اگلے پانچ سال تک انھیں انتظار کرنا پڑ سکتا ہے۔

مالی مدد کی ویب سائٹ ’گو فنڈ می‘ کے مطابق فرگوسن گذشتہ برس نومبر میں تھینکس گیونگ ڈے سے ہسپتال میں داخل ہیں اور انھیں دل کی شریانوں میں مسائل کا سامنا ہے جس سے ان کے پھیپھڑوں میں خون اور پانی بھر جاتا ہے۔

فرگوسن کے لیے عطیات جمع کرنے والے آرگنائزر کا کہنا ہے کہ فرگوسن نے کووڈ ویکسین سے متعلق خدشات کا اظہار اس لیے کیا تھا کیونکہ انھیں دل میں سوزش کا خطرہ ہے اور یہ اس ویکسین کا ایک ممکنہ ردعمل یا نقصان ہو سکتا تھا، جس کے متعلق امریکی سینٹر فار ڈیزیز کنٹرول اینڈ پریونشن کا کہنا ہے کہ اس کے امکانات بہت ہی کم اور عارضی ہیں تاہم یہ دل کی صحت اور حالت کو مدنظر رکھتے ہوئے کمزور دل کے مریضوں کے لیے خطرناک ثابت ہو سکتا ہے۔

امریکی سینٹر فار ڈیزیز کنٹرول نے ایسے مریضوں، جنھیں اعضا کی پیوند کاری کی ضرورت ہے اور ان کے قریبی جاننے والوں سے کووڈ ویکیسن اور بوسٹر خوراکیں لگوانے کی حوصلہ افزائی کی ہے۔

نیویارک یونیورسٹی کے گراسمین سکول آف میڈیسن کے شعبہ میڈیکل ایتھکس کے سربراہ ڈاکٹر آرتھر کپلان نے سی بی ایس نیوز کو بتایا کہ اعضا کی پیوند کاری یا ٹرانسپلانٹ کے بعد مریض کا مدافعاتی نظام مکمل طور بند ہوتا یا بہت زیادہ کمزور ہوتا ہے اور ایسے میں عام نزلہ زکام ان کے لیے جان لیوا ثابت ہو سکتا ہے۔

ان کا مزید کہنا تھا کہ ’انسانی اعضا کی پہلے ہی بہت قلت ہے اور یہ ہم کسی ایسے شخص کو نہیں لگا سکتے جس کے زندہ رہنے کے امکانات بہت کم ہوں جبکہ اس کے برعکس دوسرے لوگ ویکسین شدہ ہیں اور ان کے زندہ رہنے کے امکانات زیادہ ہیں۔‘

یہ بھی پڑھیے

امریکی شہری کو سؤر کا دل لگا دیا گیا، کارنامہ سرانجام دینے والی ٹیم میں پاکستانی ڈاکٹر بھی شامل

جس کا دنیا میں کوئی نہیں اس کا ٹرانسپلانٹ کیسے ہوگا؟

کیا کبھی پرانے دل کی جگہ نیا دل بنایا جا سکے گا؟

فرگوسن کے قریبی عزیزوں نے بتایا کہ وہ دو بچوں کے باپ ہیں اور ان کے ہاں تیسرے بچے کی پیدائش ہونے والی ہے۔

فرگوسن اب بھی ہسپتال میں داخل ہیں۔ ان کے خاندان کا کہنا ہے کہ وہ انتہائی کمزور ہیں اور انھیں دوسرے ہسپتال منتقل کرنا ممکن نہیں اور ’ان کے پاس وقت ختم ہو رہا ہے۔‘

فرگوسن کے والد ڈیوڈ کا کہنا ہے کہ ’میرا بیٹا بڑی بہادری سے اس حالات کا مقابلہ کر رہا ہے اور جس طرح وہ اپنے اصولوں اور مؤقف پر ڈٹا رہا ہے اس نے میرے دل میں اس کی عزت مزید بڑھا دی ہے۔‘

وہ کہتے ہیں کہ ’یہ اس کا جسم اور اس کی مرضی ہے۔‘

یہ پہلی مرتبہ نہیں کہ کسی غیر ویکسین شدہ مریض کو امریکہ میں علاج کے لیے رکاوٹوں کا سامنا کرنا پڑا ہو۔

اس ماہ کے اوائل میں مینسوٹا سے تعلق رکھنے والی ایک خاتون نے اپنے مقامی ہسپتال کے خلاف اس وقت مقدمہ درج کروا دیا تھا جب ڈاکٹروں نے ان کے غیر ویکسین شدہ شوہر کو وینٹی لیٹر سے ہٹانے کی کوشش کی تھی۔ ان کے شوہر گذشتہ دو ماہ سے زائد عرصے سے وینٹی لیٹر پر تھے۔

واضح رہے کہ امریکہ میں 63 فیصد آبادی نے کووڈ ویکسین کی دو خوراکیں لگوائی ہیں جبکہ 40 فیصد آبادی نے بوسٹر ڈوز کی تیسری خوراک بھی لگوا لی ہے۔