کہاں گیا وہ پاناما؟ کہاں گیا وہ مانیٹری جج: کیپٹن (ر) صفدر

مسلم لیگ ن کے رہنما کیپٹن ریٹائرڈ محمد صفدر کا کہنا ہے کہ اب وقت ہے کہ پوچھیں کہاں گیا وہ پاناما؟ کہاں گیا وہ مانیٹری جج؟

مسلم لیگ ن کے رہنما کیپٹن ریٹائرڈ محمد صفدر اپنی اہلیہ مریم نواز کو لندن کے لیے رخصت کرنے لاہر ایئر پورٹ آئے تھے، جہاں انہوں نے میڈیا سے گفتگو کرتے ہوئے یہ سوال اٹھایا۔

ان کا کہنا ہے کہ میں تو ابھی ادھر ہی ہوں، میرے 26 مقدمے ابھی باقی ہیں، میرے مقدمے پنڈی، پشاور، گوجرانوالہ، لاہور اور مانسہرہ میں ہیں تو پھر میں کیسے جاؤں؟

مسلم لیگ نون کے رہنما، سابق وزیرِ اعظم میاں نواز شریف کے داماد اور مریم نواز کے شوہر کیپٹن ریٹائرڈ صفدر پشاور ہائی کورٹ میں پیشی کے دوران طبیعت ناساز ہو گئی جس پر انہیں روزہ بھی توڑنا پڑ گیا جس کے بعد وہ اسلام آباد کے اسپتال کے لیے روانہ ہو گئے۔

کیپٹن (ر) صفدر کا کہنا ہے کہ یہ حکومتیں اللّٰہ کی ہوتی ہیں، اللّٰہ لوگوں کو ذمے داریاں دے دیتا ہے، اللّٰہ کرے ہماری جماعت یہ ذمے داری احسن طریقے سے نبھا سکے۔

انہوں نے کہا کہ ڈا رصاحب کے آنے سے کافی تبدیلی نظر آئے گی، یہ مشکل وقت ہے، ظلم کا مقابلہ کرنا ضروری ہوتا ہے، ریاستِ پاکستان کے لیے تکلیفیں برداشت کرنی پڑیں گی۔

مریم نواز کے شوہر نے مزید کہا کہ مریم لندن جا رہی ہیں، 3 سال بعد اپنے والد کو ملیں گی، جب سے ان کی والدہ فوت ہوئی ہیں، وہ اپنے بھائیوں سے نہیں مل سکیں۔

کیپٹن(ر)صفدر کا یہ بھی کہنا ہے کہ گلے لگ کر جو بہن بھائی اپنی والدہ کے جنازے پر روتے ہیں مریم کا یہ ارمان آج پورا ہو گا۔

بشکریہ جنگ