کورونا کی نئی لہر: پاکستان نے نیا سفری ہدایت نامہ جاری کردیا

ملک میں کورونا وائرس کی نئی لہر کے پیش نظر سول ایوی ایشن اتھارٹی (سی اے اے) نے نیا سفری ہدایت نامہ جاری کردیا ہے۔

سی اے اے کے نوٹیفکیشن کے مطابق کورونا ایس او پیز کے تحت مختلف ممالک کو 3 کٹیگریز میں تقسیم کردیا گیا ہے۔

ہدایت نامے کے مطابق برطانیہ کو کٹیگری سی سے نکال کر کٹیگری بی میں شامل کردیا گیا جبکہ کٹیگری اے میں آسٹریلیا، چین، جاپان، نیوزی لینڈ اور سعودی عرب سمیت 20 ممالک شامل ہیں۔

نوٹیفکیشن کے مطابق کیٹگری اے کے مسافروں کے لیے کورونا وائرس کا ٹیسٹ کروانا لازمی نہیں ہے جبکہ سی کیٹگری میں جنوبی افریقا، پیرو، کینیا، برازیل، پرتگال سمیت 12 ممالک شامل ہیں، کٹیگری سی میں شامل ممالک کے مسافروں کی آمد این او سی کی اجازت سے مشروط ہیں۔

سی اے اے نوٹیفکیشن کے مطابق کیٹیگری اے اور سی کے علاوہ باقی تمام ممالک کیٹیگری بی میں ہیں، کٹیگری بی کے مسافروں کا پی سی آر ٹیسٹ کا دورانیہ 72 گھنٹے ہوگا۔

سی اے اے حکام کے مطابق سفری ہدایات پر مبنی نیا نوٹیفکیشن 23 مارچ سے 5 اپریل 2021 تک نافذ العمل رہے گا۔

بشکریہ جنگ