کنواروں کو کس کینسر کا زیادہ خطرہ؟

چینی ماہرین کی تحقیق سے یہ بات سامنے آئی ہے کہ انسانی موت کی تیسری بڑی وجہ پیٹ کا کینسر ہے، جس کا خطرہ سب سے زیادہ غیر شادی شدہ اور طلاق یافتہ افراد کو ہوتا ہے۔

ماہرین کا کہنا ہے کہ شادی شدہ افراد میں پیٹ کے کینسر کی جلد تشخیص ممکن ہے جبکہ سابقہ تحقیق سے یہ بات ثابت ہوئی ہے کہ ایسے کینسر کے مریض جو شادی شدہ ہیں ان میں قبل از وقت موت سے بچاؤ کی شرح زیادہ پائی جاتی ہے۔

محققین کا کہنا ہے کہ غیر شادی شدہ افراد کے مقابلے میں شادی شدہ افراد میں کینسر کے خلاف بہتر قوتِ مدافعت ہوتی ہے۔

پروفیسر ایمن ژو (Aman Xu) کے مطابق شادی شدہ افراد مالی اعتبار سے زیادہ مستحکم ہوتے ہیں، ان کے پاس اپنے جذبات کے اظہار کے لیے ایک ساتھی موجود ہوتا ہے جس کے باعث ان افراد کے کینسر میں مبتلا ہونے کے مواقع کم ہو جاتے ہیں۔

پروفیسر اور محققین کی ایک ٹیم نے 2010ء سے 2015ء کے دوران امریکا میں ایسے 3647 افراد کا معائنہ کیا جن میں ٹیومر ابتدائی اسٹیج پر تھا جس نے دیگر اعضاء کو ابھی متاثر نہیں کیا تھا۔

ان مریضوں میں شادی شدہ افراد میں صحت یابی کا تناسب 72 فیصد رہا، جن میں بیشتر خواتین تھیں، جبکہ بیوہ خواتین میں یہ تناسب 51 فیصد رہا۔

اس تحقیق کی بنیاد پر محققین کا کہنا ہے کہ ڈاکٹروں کو چاہیے کہ کینسر میں مبتلا افراد کی زندگی کتنی باقی ہے، اس بات کا تعین کرتے وقت ان کے شادی شدہ یا کنوارے ہونے کو مدِ نظر رکھنا ضروری ہے۔

بشکریہ جنگ