کراچی میں دورانِ پولنگ کوئی ناخوشگوار واقعہ پیش نہیں آیا: آئی جی سندھ

آئی جی سندھ غلام نبی میمن نے کہا ہے کہ کراچی میں پولنگ کے دوران کہیں بھی کوئی ناخوش گوار واقعہ پیش نہیں آیا۔

کراچی کے علاقے ملیر میں میڈیا سے گفتگو کرتے ہوئے انہوں نے کہا کہ صبح سے پولنگ کا عمل جاری ہے، کوئی ناخوش گوار واقعہ پیش نہیں آیا۔

آئی جی سندھ نے کہا کہ ضلعی انتظامیہ کے ساتھ مل کر پولیس اور رینجرز کام کر رہی ہیں۔

الیکشن کمشنر سندھ اعجاز انور چوہان نے کہا ہے کہ کراچی میں قومی اسمبلی کے دونوں حلقوں میں پولنگ کا عمل پُرامن انداز سے جاری ہے، تمام وزراء پر حلقوں کا دورہ کرنے پر مکمل پابندی ہے۔

انہوں نے یہ بھی کہا کہ ضمنی انتخابات کے حوالے سے تمام سیکیورٹی انتظامات کا جائزہ خود لے رہا ہوں۔

واضح رہے کہ سندھ، پنجاب اور خیبر پختون خوا کے قومی اسمبلی کے 8 اور پنجاب اسمبلی کے 3 حلقوں میں ضمنی انتخابات کے لیے پولنگ جاری ہے۔

صبح 8 بجے شروع ہونے والی پولنگ کسی وقفے کے بغیر شام 5 بجے تک جاری رہے گی۔

بشکریہ جنگ