کراچی: صدر بم دھماکے کا مقدمہ سی ٹی ڈی تھانے میں درج

کراچی کے علاقے صدر میں ہونے والے  بم دھماکے کا مقدمہ سی ٹی ڈی تھانے میں درج کرلیا گیا، مقدمے میں انسداد دہشت گردی کی دفعات شامل کی گئی ہیں۔

پولیس کا کہنا ہے کہ مقدمہ ایس ایچ او پریڈی کی مدعیت میں درج کیا گیا، مقدمے میں بم ڈسپوزل (بی ڈی) رپورٹ کو بھی شامل کیا گیا ہے۔

پولیس کے مطابق دھماکہ مرشد بازار کے قریب ایک بیکری اور ہوٹل کے باہر ہوا جہاں رات کے اس پہر کافی چہل پہل ہوتی ہے۔

مقدمے میں ایک جگہ ٹائم ڈیوائس اور دوسری جگہ ریموٹ ڈیوائس سے دھماکا کرنا بتایا گیا۔

واضح رہے کہ گذشتہ روز  کراچی کے مصروف ترین علاقے صدر میں زوردار دھماکا ہوا تھا، جس میں ایک شخص جاں بحق اور 7 افراد زخمی ہوگئے تھے، جبکہ متعدد گاڑیوں کو بھی نقصان پہنچا تھا۔

بشکریہ جنگ