کراچی سمیت ملک بھر میں بارشوں کی پیشگوئی

محکمہ موسمیات نے رواں ہفتے کے دوران کراچی سمیت ملک بھر میں بارشوں کی پیشگوئی کر دی۔

محکمہ موسمیات کے مطابق آج رات سے مون سون ہوائیں ملک کےبالائی علاقوں میں داخل ہونے کا امکان ہے اور یہ ہوائیں 25 ستمبر تک ملک کے دیگر حصوں میں بھی بارش کا باعث بن سکتی ہیں۔

آج سے جمعہ تک کشمیر، اسلام آباد، راولپنڈی میں وقفے وقفے سے گرج چمک کے ساتھ بارش کا امکان ہے،جبکہ اٹک، چکوال، جہلم، گجرات، منڈی بہاؤ الدین، مانسہرہ میں بھی وقفے وقفے سے بارش متوقع ہے۔

کراچی میں بارش کی ہیٹ ٹرک ہوگئی، آج بھی صبح کا آغاز حبس سے ہوا، لیکن دوپہر ہوتے ہی کالے بادل آئے اور گرمی کو بھگا کر لے گئے، پچھلے دو دنوں سے ہونے والی بارش مختلف علاقوں میں ہوئی تھی پر آج شہر میں تقریبا ہر جگہ ہی بارش ہوئی ۔

اس کے علاوہ ہری پور، مردان، چارسدہ، نوشہرہ، دیر میں وقفے وقفے سے بارش کی پیشگوئی ہے، چترال، پشاور، کوہاٹ، گلگت بلتستان میں وقفے وقفے سے بارش کا امکان ہے۔

محکمہ موسمیات کا مزید کہنا ہے کہ جمعرات سے ہفتہ تک کراچی ، مشرقی بلوچستان، جنوبی پنجاب میں گرج چمک کے ساتھ بارش متوقع ہے۔

بشکریہ جنگ