چین نے مشکل وقت میں بھائی کی طرح پاکستان کی مدد کی، چینی وزارت خارجہ

ترجمان چینی وزارت خارجہ وانگ وین بن کا کہنا ہے کہ چین نے مشکل وقت میں پاکستان کی حقیقی دوست اور بھائی کی طرح مدد کی ہے۔

انہوں نے کہا کہ سیلابی صورتحال کے بعد سے ہی چین پاکستان کی مدد کر رہا ہے۔

ان کا کہنا تھا کہ چین اب تک 40 کروڑ چینی یوآن کی انسانی امداد پاکستان بھیج چکا ہے۔

ترجمان چینی وزارت خارجہ نے کہا کہ چین کی سول سوسائٹی بھی پاکستان میں امدادی سرگرمیوں میں شامل ہے۔

انہوں نے کہا کہ سیلابی متاثرین کی بحالی کے لیے پاکستان کی امداد جاری رکھیں گے، چین اور پاکستان کے درمیان سودمند معاشی اور مالیاتی تعاون رہا ہے۔

انہوں نے مزید کہا کہ پاکستانی عوام بھی پاک چین سودمند تعاون کو اچھی طرح جانتے ہیں۔

چینی ترجمان نے کہا کہ پاک چین تعاون پر بلاوجہ تنقید کے بجائے امریکا پاکستانی عوام کی حقیقی معنوں میں مدد کرے۔

واضح رہے کہ امریکا نے پاکستان کو چین سے قرضوں میں ریلیف لینے کا مشورہ دیا تھا جس پر چین کی وزارت خارجہ کے ترجمان نے اپنا ردعمل دیا۔

بشکریہ جنگ