پاک بھارت کرکٹرز کو دنیا بھر میں پسند کیا جاتا ہے، یوسف پٹھان

سابق بھارتی کرکٹر یوسف پٹھان نے صحافیوں سے گفتگو میں پاکستان اور بھارتی ٹیم کا دلچسپ موازانہ کیا ہے۔

دبئی میں پاکستانی صحافیوں سے گفتگو میں یوسف پٹھان نے کہا کہ بھارت اور پاکستان کے پلیئرز کو پوری دنیا میں پسند کیا جاتا ہے۔

انہوں نے کہا کہ ایسوسی ایٹ ملکوں کی لیگ سے کھیل کو ترقی ملے گی، اگر پاکستانی پلیئرز آئی پی ایل میں ہوتے تو سب کو مزہ آتا۔

سابق بھارتی کرکٹر نے مزید کہا کہ پاکستان اور بھارت کے پلیئرز ایک دوسرےکے خلاف کھیل کو بہت انجوائے کرتے ہیں۔

ان کا کہنا تھا کہ پاکستان اور بھارت کا مقابلہ دنیا دیکھنا چاہتی ہے، اس سے پلیئرز کو بھی سیکھنے کو ملتا ہے۔

یوسف پٹھان نے یہ بھی کہا کہ دونوں ملکوں کے درمیان کرکٹ کب ہوتی ہے یہ تو ملکوں کے بڑوں نے طے کرنا ہے۔

انہوں نے کہا کہ میرا خیال ہے بھارت کو اب بھی پاکستان ٹیم کیخلاف برتری حاصل ہے، ہم اس بات کے ساتھ ہی ہیں جو ملک کے بڑے طے کریں گے۔

سابق بھارتی کرکٹر نے کہا کہ ایسا نہیں ہے کہ ہمیشہ ایک ہی ٹیم جیتے لیکن بڑے ٹورنامنٹ میں بھارت کا پاکستان کیخلاف ریکارڈ اچھا ہے، وہ پریشر اچھا ہینڈل کرتا ہے۔

ان کا کہنا تھا کہ پاکستان کے پاس کافی اچھے کرکٹرز رہے ہیں، اچھی بات ہے کہ موجودہ پلیئرز پاکستان کے کیلئے اچھی کرکٹ کھیل رہے ہیں۔

یوسف پٹھان نے کہا کہ پاکستان کے ٹاپ پلیئرز اور بینچ میں کافی فرق ہے جبکہ بھارت کی بینچ اسٹرینتھ بہت اچھی ہے، ہر پلیئر کا متبادل موجود ہے۔

بشکریہ جنگ