پاکستان میں پچز کیلئے آسٹریلیا سے مٹی لانا ایک مہنگا کام ہے، ڈیمین ہوف

چیف کیوریٹر ایڈیلیڈ اوول ڈیمین ہوف نے پاکستان میں پچز کے لیے آسٹریلیا سے مٹی لانے کو مہنگا کام قرار دے دیا۔ 

کراچی میں میڈیا سے گفتگو کے دوران ڈیمین ہوف نے کہا کہ پاکستانی لوگ کرکٹ کے لیے بہت جذباتی ہیں، یہاں آنے کا تجربہ بہترین رہا۔

انہوں نے کہا کہ میں نے مختلف گراؤنڈز میں کیوریٹرز سے بات کی، میں یہاں کسی پر تنقید کرنے نہیں آیا، ہر ملک کا پچ بنانے کا اپنا طریقہ کار ہوتا ہے۔

چیف کیوریٹر ایڈیلیڈ اوول نے مزید کہا کہ آسٹریلیا کے مقابلے میں یہاں اتنی جدید ٹیکنالوجی نہیں، نیا ناظم آباد کرکٹ گراؤنڈ میں بہت اچھی سہولیات موجود ہیں۔

اُن کا کہنا تھا کہ ایسی پچ بنانی چاہیے جس پر بیٹرز اور بولرز دونوں کے پاس پرفارم کرنے کا موقع ہو۔

ڈیمین ہوف نے یہ بھی کہا کہ میں یہاں پر گراسی پچز بنانے کی تکنیک سکھانے آیا ہوں، ہم مل کر پاکستان میں بہتر پچز بناسکتے ہیں۔

انہوں نے کہا کہ میرا کام صرف ڈراپ ان پچ بنانے میں مدد کرنا ہے، آسٹریلیا سے مٹی لانا ایک مہنگا کام ہے۔

بشکریہ جنگ