ٹی 20 سیریز: پاکستان ویمن نے دوسرے میچ میں آئرلینڈ کو شکست دیدی

پاکستان ویمن نے آئرلینڈ کو دوسرے ٹی ٹوئنٹی میچ میں 6 وکٹوں سے شکست دے کر سیریز ایک ایک سے برابر کر دی۔

لاہور میں بارش کے باعث دوسرا ٹی ٹوئنٹی میچ ایک گھنٹے تاخیر سے شروع ہوا، میچ کی ایک اننگز کو 17 اوورز تک محدود کر دیا گیا تھا۔

قذافی اسٹیڈیم میں پاکستان ویمن نے ٹاس جیت کر پہلے بولنگ کا فیصلہ کیا، آئر لینڈ ویمن نے مقررہ اوورز میں 7 وکٹوں کے نقصان پر 118 رنز بنائے۔

 آئرش کھلاڑی ایمی ہنٹر نے 36 اور اورلا پرینڈرگسٹ نے 20 رنز کی اننگز کھیلی۔

پاکستان کی جانب سے ندا ڈار نے 19 رنز جبکہ نشرہ سندھو نے 21 رنز دے کر دو دو وکٹیں حاصل کی۔

پاکستان ویمن کرکٹ ٹیم کی آل راؤنڈر ندا ڈار نے کہا ہے کہ آئرلینڈ کے خلاف پہلے ٹی ٹوئنٹی میچ کی وکٹ اچھی تھی، شروع سے معلوم تھا کہ یہ بیٹنگ وکٹ ہے۔

جواب میں پاکستان ویمن نے مطلوبہ ہدف 16 اوورز میں پورا کر لیا۔

پاکستان ویمن کی طرف سے جویریہ خان نے 35 اور ندا ڈار نے 28 رنز بنائے جبکہ عائشہ یوسف نے جارحانہ 25 رنز کی ناقابل شکست اننگز کھیلی۔ 

ندا ڈار کو آل راؤنڈ پرفارمنس پر پلیئر آف دی میچ قرار دیا گیا۔

واضح رہے کہ سیریز کا تیسرا اور فیصلہ کن میچ 16 نومبر کو کھیلا جائے گا۔

بشکریہ جنگ